智取大市|為何反彈總是美股強(晉佳)

更新時間 (HKT): 2021.03.12 09:56

科指周初向下拋離保歷加下軸以及5天線,形成升市見頂訊號嘅相反版本,科技股隨即絕地反彈。如果當係升市走勢相反咁睇,科指目前接近10天線就係首個阻力,不過恐慌情緒逐漸消散,估計稍後會明顯突破10天線、等大家信心滿滿時先再嚟震倉,然後正式進入反覆市況,咪以為市況又有條件一條氣炒上。唔少科技股喺年初實在過度亢奮之下炒得太貴,一冷靜落嚟,盈利增長有排未pick up到,實在難以寄望大戶再同你瘋搶,股價再創高峯。

港股上市科技股周四(11日)力追美國科技股落後,追到氣咳。點解港股反彈力度總係有所不及?最簡單直接原因係美股成交夠大,以Tesla為例,即使逾6,000億美元市值,低位4個交易日成交就佔市值四分之一,短短幾日內,股東結構隨時大執位,消化蟹貨、獲利盤速度離奇地高,容許股價快速上落。

講開Tesla,年初升10倍嘅力勁(558)作為Tesla壓鑄機供應商嘅母公司,股價近期亦緊貼Tesla。Tesla想學蘋果iPhone構建全球供應鏈就係人都知,玩法係選出有潛力嘅細路,提供技術方案,等供應商設計生產高端嘅機器零件,當中畀返龐大訂單兼且高於市場嘅毛利率作為甜頭。力勁股價調整後嘅年度化市盈率41倍,作為Tesla供應商之一,估值同蘋果供應商差唔多,係較現實水平。力勁好處係旗下壓鑄機Giga Press訂單未完全反映喺業績,只要Tesla未來付運量增長,就同時帶動Giga Press訂單,形成增長護城河。

力勁最大問題係太多人低位掃貨lead住幾倍,呢批獲利盤有排消化,尤其未來反覆市況下,沽貴買平可能繼續成為短暫潮流,預咗爆上就遇上沽壓,但比較其他10倍股,例如斬過倉嘅澳能(1183)同埋炒SaaS但冇往績嘅阜博(3738)一比,力勁已算係較堅實選擇,即使未來幾個月當係炒波幅之選亦算不錯。

晉佳

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner