譚仔姐姐口音依舊 日本公司無要求戒

更新時間 (HKT): 2021.03.15 14:14
譚仔國際行政總裁劉達民。

「懶肉勿演實小辣」,譚仔姐姐口音多年不變,由被人取笑到自娛,譚仔國際行政總裁劉達民覺得對品牌形象正面,已成為譚仔文化一部分,不會下令戒掉,但笑稱:「你可能越食越辣,佢可能越講越純正。」

深入民心的譚仔姐姐口音,實為帶鄉音的廣東話,被劉達民視為譚仔文化之一,他稱,這見證了新移民融合香港的歷史及文化,對公司品牌來說是件好事,又謂公司轉手後無意糾正其口音,「我覺得好似大家食辣咁,你可能越食越辣,佢可能越講越純正,你享受中間個過程咪得囉。」但他強調,聘請時不會刻意指定背景或性別,事實上餐廳亦有一些譚仔哥哥。

三哥姐姐即席示範譚仔話

「譚仔姐姐」之所以形成,據指是早年員工不斷介紹同鄉應徵得來,任職譚仔三哥三年的麗姐家鄉在內地,向《蘋果》坦言最初都不適應口音被人關注,但「聽聽吓都覺得幾有趣」,但很快便適應下來。

她又用「譚仔話」憶述初入職時有食客特意跟她對答的趣事:「啱啱入職,佢話要『畜牲』,我話『先生,唔好意思我哋冇賣畜牲』,佢仲不停指住餐牌話『呢個咪畜牲(竹笙)囉』,當時落單都一頭霧水。」麗姐說,已視公司為大家庭,感謝上司提拔及同事間關懷。

譚仔姐姐:見證越食越辣好開心

譚仔在社會推出不少慈善活動,為員工提供福利也不少,如2015年起每年推出「員工子女獎學金」,供子女讀大學,其中少萍姐的兒子連續四年取得獎學金,直言獎學金是令兒子成功考入大學的原因。

少萍姐在譚仔已任職17年,現時是區店長,現時管理港島區9間鋪,她表示,工作最難忘的是見證食客越食越辣:「佢哋由小辣食到特辣,食完會滿頭大汗,但係好似好享受,我哋見到就好開心」,有些熟客在不同分店相遇亦一見如故。對於經歷新舊老闆管治,少萍姐亦識做讚新管理層,「好多嘢係有改善嘅,例如好多福利都好咗」,又謂「唔同地方譚仔好準時出糧,呢個係我哋打工仔最需要嘅。」

有舖將休業1天 邀請低收入家庭

譚仔過去亦曾與慈善機構協辦活動以回饋社會,劉達民指:「好似之前『譚仔遮遮』活動同協康會合作,亦都聯乘咗18個插畫師,主要係我哋關注緊一啲特殊教育需要兒童,尤其是低收入家庭,佢個配套係唔足夠,同埋care taker係好辛苦,我哋好感動就去幫呢樣嘢,上次活動就籌左20萬。」

另外譚仔三哥亦有「線」有善報計劃,「你叫少米嘅,咁我哋就捐多2蚊俾協康會,另外就三哥都計畫緊將某一間舖休業一日,咁嗰一日就同聖雅各福群會合作,邀請一啲低收入嘅家庭嚟食,咁嗰日就全日都做低收入家庭,希望呢個都可以延伸落去,唔好淨係某一區,可能區區都有咁嘅需要。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner