操盤手札記|債息殺上點擋煞(割柑人)

更新時間 (HKT): 2021.03.15 17:06
美國10年期國債拍賣之後,市場焦點轉向聯儲局本周議息。

上月以嚟,全球金融市場由美國國債孳息主導。上周三,美國公佈2月CPI;同日,拍賣10年期國債,兩者顯示商品通脹同通脹預期一如市場所料穩步上升。上周五,10年期債息再度升破1.6厘,高見1.642厘,係年幾以嚟首破1.64厘。債券拍賣之後,市場焦點轉向聯儲局本周議息。

美國進入夏令時間,聯儲局將於本港周四凌晨2時公佈議息結果。今趟聯儲局面對唔少通脹相關風險:一、10年期債息飆升;二、銀行補充槓桿率(SLR)豁免措施月尾到期,若唔延長,銀行將被迫拋售國債;三、財政部總賬戶(TGA)將喺月尾規模減半,對中長期債價造成壓力。

2008年金融海嘯後,市場最重要參與者唔係大戶或散戶,而係央行,放水收水牽引市場。央行可以不停放水,皆因過去12年通脹極低;但今次抗疫放水,同12年前唔同,今次財政介入規模遠高於上次,令通脹升溫速度亦遠高於上次。聯儲局仍以舊思維睇低通脹風險,就係最大風險!

市場預期通脹勢將超過2%、聯儲局年半後勢將加息,並提前計價。通脹憂慮不利市況,法興策略師Kit Juckes預測,10年期債息達2厘前,市場「唔會太平」。聯儲局會否改口風遏長債息,周四要睇實。

周一(15日)港股反彈力弱,微升0.3%,呈頭肩頂,關鍵係1月尾低位28,259守唔守得住。債息殺氣大,上月尾就曾出現股債滙金四殺局面!資金流入具防守性嘅收息股擋煞。過去20年派息(連紅股計)有增無減,能提供穩定股息回報嘅港股,包括公用股中電(002)、煤氣(003)、電能(006)同長建(1038)。當中,電能周一升0.9%,收44.95元,股息率6.2厘,呈三角突破,該股周三(17日)公佈業績。

割柑人

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner