【智取大市】Bitcoin首站挑戰英鎊? - 晉佳

更新時間 (HKT): 2021.03.15 02:00
■Bitcoin仍然停留喺風險投資工具嘅層面,冇人敢高調走出嚟大做,大行都只係蜻蜓點水參與一下而已。 資料圖片

執筆時Bitcoin市值係1.13萬億美元,而美元貨幣供應M1係6.75萬億美元,英鎊M1 3.04萬億美元。如果Bitcoin價格仲繼續爆升,同時憧憬能夠成為主流買賣單位,可以存、借、槓桿,第一站就係超越英鎊。當然,一切只係如果。

Bitcoin嘅供應並非有限的,其實主宰喺市值度,相對美元市值升多1倍嘅話,就相當於貨幣供應大1倍,因為作為交易單位,係同貨物相比。喺佢「冇大台」嘅特性下,冇一個機構能夠一錘定音決定佢嘅供應,究竟點樣發揮佢嘅貨幣特性?金融機構點樣決定佢嘅儲備比率?就當嫌傳統金融玩法老土,要摵甩佢,咁點樣確保Bitcoin安全穩定使用又獲廣泛信任?以上種種都令佢停留喺風險投資工具嘅層面。要有機構做勇者為Bitcoin大幅度提供存、借、槓桿功能?隨時因為價格大幅波動,加上交易對手風險極不透明之下,輸死冇命賠,因此亦冇人敢高調走出嚟大做,大行都只係蜻蜓點水參與一下而已。

黃金之所以能夠有今日嘅地位同市值,原因係金本位制曾經喺貨幣歷史上發揮過不可磨滅嘅重大作用,以及傳統嫁娶需求形成嘅護城河,加密貨幣實在難以喺短時間內奠定深厚地位,一切要面對時間嘅考驗。加密幣競爭力仍然遠離黃金同主流貨幣,係不爭事實。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner