收市閒情|中美灣仔office爭奪戰(千頌C)

更新時間 (HKT): 2021.03.16 19:58
美國駐港總領事館發言人上年底曾表示,美國政府計劃翻新在港物業,當中包括位於中環花園道26號的美國駐港領事館。

中美政治角力對對碰,香港自2019年,已經成為擂台之一,戰線甚至已延伸到office爭奪戰,而主角之一係華懋灣仔甲級商廈One Hennessy。

話說政府最近大手租入One Hennessy其中五層樓面,總樓面大約6萬呎左右。之前有傳媒都報道過,政府一路都想幫警隊新成立嘅國安處搵個大office,事關而家灣仔警察總部,要處理國家安全重大案件,實在係唔夠用(一單案都47人,你明點解唔夠用啦)。咁啱嘅係,One Hennessy同警總真係一街之隔。於是早前真係有記者問過警察公共關係科:喂喂,One Hennessy係咪用去擴充警隊辦公地方呀?咁當然啦,梗係冇覆。

咁又關美國咩事呢?事緣位於中環花園道嘅美國領事館要翻新,裝修期間都要搵地方搬。於是上年就同華懋洽租One Hennessy,但最後傾唔成事。結果幾個月後,呢個大office,係就係官方機構租咗,不過係中國香港,唔係美國。

又話而家office市況一般,點解兩個都偏偏睇中One Hennessy?我都問過吓啲行內人,佢話office租盤係有,不過大貨真係絕無僅有,如果講過8萬呎核心區,One Hennessy係難得一見嘅選擇。咁美國領事館點算呢,市場傳聞而家傾租傾返過對面海,要走到去ICC。傾唔傾得成?未知。

香港中區,係香港嘅經濟命脈,近年已逐漸變成中資天下。外資走嘅走,縮嘅縮,取而代之係中資趁機掃貨,野村上年棄租IFC二期一層半樓面,結果部份退租樓層,由東莞銀行接貨。少了自由行,尖沙咀海旁係好行咗,不過夜晚望過去港島,我只係記得有好多中資公司嘅燈牌。中環,今日都仲可以叫國際金融中心嘅核心,過多幾年,好可能只係大灣區其中一個金融小區。如果美國領事館真係要暫搬返過九龍,只可以話:符合國情。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner