【魚樂無窮】北水新貴怎操作 - 唐牛

更新時間 (HKT): 2021.03.16 02:00
■不少港股通新貴昨日虎頭蛇尾。入咗北水名單,北水未必會買;就算肯買,又未必一定會升。 資料圖片

A股弱勢,創業板指數怒插半成,抱團股變抱頭痛哭股,港股埋單仍有升幅,尚算硬淨。香港的抱團股如騰訊(700)、美團(3690)、藥明(2269)全線仆直,跟足阿爺的路線圖;另一邊廂舊經濟股繼續硬淨,內銀內房加埋隻逃出鬼門關的小米(1810),足夠撐起大市。

大市處於鹹淡水交界之際,可以做甚麼呢?有人選擇轉攻舊經濟股,博繼續大漲小回;有人選擇炒指數,貪佢夠波幅玩幾轉。我自己就一如以往,市靜寧願忍忍手,唔會入場亂衝,就算手痕都係小注怡情,注碼唔會傷身。始終逆風操作難度極高,更有機會得不償失,倒不如等派對重開再搏殺。

不少港股通新貴虎頭蛇尾,高開低收的比比皆是,我上星期五博隻泡泡瑪特(9992),埋單都贏少一半。北水唔係會狂掃咩?市況唔就,內地資金自己都顧唔掂,邊有閒情逸致南下shopping。更重要的是,北水炒高係一廂情願的想法,入咗北水名單,北水未必會買;就算肯買,又未必一定會升。噚日早上的升勢,不排除係自我實現的結果(自己炒上),下次再博北水概念股時,最緊要睇實食糊時機。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner