【魚樂無窮】悶市下檢閱持股 - 唐牛

更新時間 (HKT): 2021.03.18 02:00
■李氏大藥廠在股東會通過分拆眼科業務後,買盤明顯增加,成交同步上升,相信好快會有IPO消息。互聯網圖片

恒指噚日表面上有400點波幅,但下午兩點後,上落幅度100點唔夠,玩超貼價牛熊都未必搵到食,名副其實悶到發慌,睇股市變成浪費青春,開報價機好嘥電。

當然,要搵嘢炒總係有嘅,相對可取係全線發力嘅4S股,中升(881)、美東(1268)、永達(3669)大陽燭收市,比起同樣有一棍嘅Saas股如微盟(2013)及阜博(3738),4S股上面冇乜蟹貨,買落都舒服啲。

澳門賭業股都唔曳,銀娛(027)爆上半成,澳博(880)漲3%,可惜我睇中嘅金沙(1928),埋單只得0.4%升幅,認真唔爭氣。朝早見佢踢穿40蚊阻力,仲股輪齊加注,無奈虎頭蛇尾,怕佢行番上落區間,惟有平手走輪,揸正股同佢鬥長命。

在直播節目及fb平台反覆提示大家的李氏大藥廠(950),在股東會通過分拆眼科業務後,買盤明顯增加,成交同步上升。相信好快會有IPO消息,在完成分拆前,李氏大藥廠預計都係大漲小回格局,有跟進的戰友,夠晒水位操作。

另外兩隻芒實嘅個股,分別係和電香港(215)及嘉泓物流(2130),前者有特別息概念,後者則屬盈喜股,下星期五放榜,候低吸納勝算高。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner