風水輪樓睇|灣仔有度好風水 阿賢買樓7年轉工6次

更新時間 (HKT): 2021.03.18 00:00

風水有所謂「呼形喝象」,今集睇地形似隻鵝的灣仔,這地區有鵝頭、鵝身與鵝尾,究竟邊度先至「啱人住」?蔣博士將軒尼詩道以南的住宅評為中上級風水,形容「住嘅人非常舒服」。但灣仔街坊阿賢7年前買入「啱人住」的灣仔樓,7年來轉工6次,自覺事業不順利,擔心是否當初花幾千元聘請另一名風水師佈錯陣?為求安心,希望蔣匡文博士指點迷津。

蔣匡文博士表示,灣仔的地形似一隻臥在地上的鵝,鵝頭是利園山,有利商業發展。皇后大道東至軒尼詩道的摩理臣山是鵝身,旺名氣。鵝尾是灣仔街市,「係從來未乾淨過嘅地方。做街市就旺,做住宅就麻麻地。一樣嘢嘅好處就係另一樣嘢嘅唔好處。」如果作為住宅,住在鵝身就中上,但因為背後無靠山。在灣仔正南方的金馬倫山,其龍脈是由司徒拔道經堅尼地道轉入灣仔,亦形成灣仔西南面有高位,視為旺丁。那麼代表旺生仔、人緣佳?博士答:「可以咁講,灣仔道嘅商業冇咁旺,喺正龍體,但呢度住嘅人就非常舒服啦!」以軒尼詩道為分界線,軒尼詩道以北有利商業發展,但作為住宅,軒尼詩道越向南邊的地方就越好住。

今次睇風水的單位位於軒尼詩道以南的廣生行大廈,港人阿賢由美國回流香港,2014年做「父幹族」斥資550萬元買入灣仔廣生行大廈一個低層單位,實用468方呎,另連平台。買入單位後,他花數千元聘請風水佬睇風水。阿賢說:「我嘅宗旨係唔死得就得啦,唔好擺咗啲棹忌嘅嘢,其實係買個安心,唔係一定要發達。當時佢(風水師)話成間屋大致上可以接受,整咗4道符貼係4個角;玄關擺紫晶洞;露台向街擺兩隻大象吸水,因為斜對面有間銀行;睡房放9盞燈,房間絕對唔可以擺植物;仲話財位喺梳化角落頭。佢又講我條命好好,咩都唔使擔心。」

不過阿賢「買咗呢間屋之後,事業唔係好順利」,公司轉完一間又一間,2017年更曾返美國做兼職,數月後卻又獲另一名老闆賞識再次回來香港發展。兜兜轉轉,買樓7年來打過6份工作。他想問蔣匡文博士:「究竟我事業運點呢?將來嘅路係點?會唔會移民?屋入面風水有冇擺錯嘢?」

對於目前單位風水陣,蔣匡文博士表示:「我明佢點解呀,佢當呢間屋係六運樓,但每人睇法唔同。因為間屋已經重新裝潢,包括髹油、裝地台、換爐灶,對我嚟講已經轉運。我唔想做踢爆,不過從另一角度睇,風水好多門派,有一派叫符籙派,我唔敢講人哋得唔得,因為符籙好講寫符人嘅功力。至於紫水晶,我想問上古至清代的中國文物有冇見過紫水晶?冇,水晶係近代嘅商業活動。有人話水晶吸氣催旺,得唔得呢?我有兩個案例係唔得。」吸水象方面,視乎有無開光,若要招財,放置貔貅更適合。至於睡房9盞燈,「麻麻地,嗰度唔係間屋最旺嘅地方。」

蔣匡文博士表示,風水是指藏風聚水,主要睇龍脈及時間,前者是地形、周邊環境及座向,後者是玄空飛星,另外還有單位室內佈局。「從格局上,已睇到(呢幢樓起樓時)搵人睇過風水,因為整座大廈冇兼線⋯⋯而掌握到飛星,就算嗰度未算風水寶地,識配合飛星作出佈置都可以發一段時間。」而這個單位的飛星是不俗的,大門開旺星,所以阿賢多年來都高朋滿座。單位的財位在梳化角落處,本應放置動水催財,但適逢今年太歲位,宜靜不宜動,建議取流年財位正西方,即是睡房床邊放置無聲音的動水裝置。

不過,單位仍見幾個坊間常見風水毛病,「睡房天花掛9盞燈狀似直插睡床,戶主係咪成日肚痛呀?」睡床的頭及床邊都橫樑壓頂。客廳牆身髹灰藍色,「好彩戶主屬木,咁無問題,但如果命卦唔啱,好容易抑鬱。」廚房位於單位正中間,屬於「火燒心」,「咁會影響宅母。業主而家單身啫,如果日後要娶老婆點算呢?但如果你話一世單身嘅,咁冇問題。」另外,室內外都不適宜栽種不開花、不結果的植物,意味得個做字而無成果。

蔣匡文博士認為,從地理及時間上而言,單位風水都沒有大問題。所謂一命二運才到三風水,蔣博士睇了阿賢的命盤後表示:「佢過去10年,係事業多阻滯嘅時間,唔係代表佢搵唔到錢,唔係代表佢做唔到嘢,而係工作並唔係佢想做嘅嘢,做得唔開心。2年後就轉運,轉運後,可以咁講,佢呢世人最搵錢就係呢10年,而家仲有2年要捱,捱完之後就會順利。」

雖然阿賢7年來轉工6次,但事實上失掉了一份工,就獲新老闆青睞,而且他不諱言未曾太擔心財運。蔣匡文博士就贈他:「你性格主動,係希望想成功做一啲嘢嘅人,就唔係鍾意求其打份工,𢭃份人工。你而家都有人工㗎,唔開心咋嘛。錢方面,你祿馬交馳照命宮,點都好,都夠錢生活,只不過唔滿足於現實。至於移民,條命唔係好啱,移民只會係打份牛工一世,你性格係不甘於此。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner