【智取大市】微盟做王者未夠班 - 晉佳

更新時間 (HKT): 2021.03.19 02:00
■微盟雖然背靠騰訊,但業績夠唔夠撐住整體市銷率16.7倍嘅高估值。 互聯網圖片

大市未見方向之,聚焦業績期好過。啱啱微盟(2013)績後股價大跌18%,下半年收入只按年增長3.4%,固然嚇親人,至於佔整體收入大約四成嘅SaaS收入按年升43%,夠唔夠撐住整體市銷率16.7倍嘅高估值?

SaaS業務低基數之下,下半年客數上升一成未夠理想,致命傷係客戶流失率同時上升。再一次證明背靠騰訊(700)嘅微盟執行能力未夠好,喺贏家全取嘅新經濟大趨勢下,執行能力唔好就有輸掉整個江山嘅風險。以近乎完美嘅估值去買有執行能力高風險嘅嘢,長線你敢唔敢博?

周四資金衝入近期反彈唔多嘅新經濟龍頭,此消彼長之下,近期強勢嘅低估值績優股回吐。豐盛服務(331)早前公佈中期業績,盈利升1.3倍,股價爆上再整固,年度化市盈率都只得3.4倍,仲有每股1.2元淨現金墊底。豐盛服務主要做機電工程同物業管理等,半年收入增14%,毛利升48%,行政開支下降之下,經營溢利升1倍,表現理想,股價亦受追捧。

豐盛服務過去收入盈利表現穩定,即使最悲觀情況下,上半年度亮麗表現完全keep唔住甚至打回原形,市盈率7、8倍都唔係貴,具備長線價值。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner