智取大市|超人新刁避中美爭端(晉佳)

更新時間 (HKT): 2021.03.21 19:05
■長和及長實主席李澤鉅

回顧返長實(1113)發新股向李嘉誠基金會買入歐洲多個水利能源項目單刁,值得留意嘅係,舊年長和受到美國施壓下,痛失以色列水廠項目,證明李家喺親美國家嘅公用事業發展亮起紅燈。

超人今次減持嘅係英國、威爾斯同荷蘭公用資產,其中英國同中國近期關係越趨惡化,至於荷蘭就係美國嘅忠實盟友,李嘉誠唔使搵買家就可以一次過減持3個項目持股超過一半,除笨有精。

同時李嘉誠變相增持流動性相對高嘅長實既有物業資產、減持流動性相對低嘅歐洲公用事業,總括嚟講提升咗家族資產流動性。回購股份令長實股本不變,同時亦即時撐起股價,綑綁回購計劃亦能夠確保向長實出售資產順利獲股東通過,實在高章。啱啱中美高層會談喺充滿火藥味之下落幕,超人今次操作係咪高明?好快就知。

周五收市後公佈嘅業績,最亮眼莫過於工業股天寶(1979),全年多賺64%,比盈喜增長四至五成更佳,下半年賺1.9億,按年更升約1倍。全年計市盈率8.5倍,論工業股嚟講唔算低殘,但受惠5G加上電動車充電設備,有概念之餘,估計能為未來業績帶嚟堅實增長。

天寶過往幾年每年賺億幾,表現平穩,只係2018年大幅倒退,舊年盈利大增長足證優質。舊年10月,喺天寶從事市場推廣嘅太子爺過身,未知長遠影響,亦唔知對年逾六旬嘅主席父親帶嚟幾大打擊,希望公司上下能化悲憤為力量。及後股價照升,市場對其依然樂觀,仍具長揸價值。

講返少少市況,美國聯儲局結束SLR對大局本來影響唔大,但就可以視為寬鬆政策嘅見頂訊號,中期股市嘅向上催化劑將會減少,消息唔會帶嚟即時影響,估計整體港美股會呈反覆偏軟狀態。星期六日Bitcoin未能進一步挾高,值得作為後市參考。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner