操盤手札記|電力股叉足電上(割柑人)

更新時間 (HKT): 2021.03.22 17:28
隨着疫苗面世,經濟重啟,中國今年首兩月用電量按年增加22%。

上周,美中高層喺冰天雪地嘅阿拉斯加上演面談戲碼,係拜登政府上台後首次。鏡頭前,你一句「威脅國際秩序」,佢一句「霸權行徑」,破冰不成更雪上加霜;鏡頭後,據報會談氣氛「談不上緊張」。有分析指雙方只係各自向國民做場戲,是但啦,反正市場對呢場會談無期望。

市場關心債息多過政治show,美國聯儲局上周五宣佈,補充槓桿率(SLR)豁免措施月尾到期唔會延長,意味銀行為符資本規定可能被迫拋售國債,消息刺激10年期債息再逼1.75厘,其後稍回。美股並無急跌,以對債息敏感度高嘅科技股為主嘅納指更倒升,似有資金抄底科技股。

要注意嘅係,10年期債息同股市嘅走向,係咪由反向變正向,若非升得太急,市場係咪接受債息正常化。現時美國通脹為1.7%,就算達到聯儲局嘅2%目標,仍屬溫和,反而利好企業經營,有助推動盈利。喺經濟復蘇下,債息回升,資金由債市流入股市。不過,仍要警惕債務危機。

周一,港股反彈乏力,跌0.4%,收28,885。港股正值業績期,焦點包括周三(24日)嘅騰訊(700)、小米(1810),周五(26日)嘅美團(3690)同幾家內銀等。喺業績股尋寶,具復蘇槪念秤先啲。隨着疫苗面世,經濟重啟,電力需求增加,中國今年首兩月用電量按年增加22%,電力股叉足電上。

上周四(18日)派成績表嘅華潤電力(836),2020年度純利同派息都增加一成半,刺激股價升破去年中阻力位近10元水平。該股現價10.8元,市盈率6.8倍,股息率5.8厘。大摩發表報告指,潤電期內燃煤、風電同光伏電站平均利用時數高過同業,認為潤電估值吸引,重申「增持」評級,睇14.1元;瑞信更牛,睇16元。

割柑人

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner