BrandStory|為守71年老字號 米芝蓮潮州菜館老闆娘按樓救舖 「嘗試過,起碼無悔」

更新時間 (HKT): 2021.03.24 00:00

說到潮州菜,總令人聯想起「打冷」。一客滷味,再配一罐透心涼的啤酒,風味十足。陳勤記這所米芝蓮級潮州菜館,在香港逾70年歷史,位於上環皇后大道西的總店去年3月結束營運,同年11月原班人馬搬到康城商場,由做街坊生意轉戰商場,變化甚大。未能繼續營運老字號店,會否因為傳說中的米芝蓮「死亡之吻」?就由第三代傳人陳惠玲(Eliza)解構箇中原因。

陳勤記由創辦人陳適勤50年代在上環潮州巷做起,後來1997年搬到皇后大道西的地舖,一做就是20多個年頭。2009年,陳惠玲三姊弟在父親陳國良手上接過金漆招牌,從此多了一份傳承老店的責任。

二妹陳惠玲在接手初時,菜館正面對持續虧蝕的問題。她發現陳勤記的客源一直都有,只是廚房設備不完善,使出品範圍狹窄,「唔係話客人唔願意消費,而係個餐牌唔夠豐富,同埋個裝修如果打冷式咁樣,你都無理由收人加一 。」於是陳惠玲決定將陳勤記由打冷模式轉型成得體的潮州菜館。

菜館裝修及系統電腦化,都需要一大筆資金,陳惠玲決定向銀行按了自住樓。「可能我性格你唔好睇我好似好斯文,其實我係幾有衝勁嘅。當時因為我係單親媽媽啦,湊住兩個囡,其實當時佢哋都好細,一個4歲,一個9歲。我自己唔知點解覺得,我係睇得好通透。」

陳透露當時的投資金額約為6位數字,幸好不僅一年已經回本,更在高峯時期多開兩間分店。她慶幸當年的決定,「因為要做過先知,你自己能唔能夠成功。咁我覺得自己當時決定都係啱,起碼無悔,因為我真係有嘗試過。」

在三姊弟合作下,陳勤記的生意如日中天。由2012年至今,更連續9年獲得米芝蓮推介,這難免成為業主加租的藉口?陳惠玲笑說的確有擔心過,「當時租舖頭畀我哋個老闆就好好人,租係有加但加個比例唔算高,我覺得係合理。」隨着時代發展,業主轉了幾手,租金加幅越來越厲害,「我哋都做到幾索氣,未必真係關你個獎事,可能係關你個老字號事。」

上環店有一班街坊熟客支持,即使租金加幅大,陳惠玲原本打算繼續承租,並在日出康城開分店。惟上環店設備老化,如跳掣、塞渠等,需要大翻新。在計算過維修費後,認為續約不划算,於是決定結束上環店,原班人馬搬到康城商場。「我哋自己當然會有唔捨得,因為從小都係喺上環居住,都幾十年,不過無辦法啦因為有啲外來因素,惟有壯士斷臂。」菜館至今沿用舊舖電話,方便老顧客查詢。

由舊區轉到新商場,菜館的裝潢變得堂皇,然而那盆有71年歷史的滷水精華依舊芬芳撲鼻。「分別就係上環客係幾包羅萬有,但近一、兩年見到有啲變動,因為外來因素,遊客係減少咗,遊客本身都佔我哋舖頭生意三至四成,我哋冇咗嗰啲客其實營運上係艱難。」陳惠玲看準康城商場的商機,尤其日後更多商店進駐,預計人流亦會增加,「除咗康城呢度有街坊客,都見到周邊有啲外區客會嚟新商場。我覺得呢邊嘅客人,尤其是假日出嚟同屋企人食飯,都幾捨得消費,唔錯嘅」。

武漢肺炎打擊飲食業,堂食禁令朝令夕改,令一眾餐廳店主難適應。陳惠玲回想,上環店去年3月24日結束營業,直至同年11月才搬到康城商場,中間無營運的時段,她與員工都集中火力準備新店事宜,因此去年的疫情並沒有直接衝擊到菜館,算是有點幸運。

經歷過疫情,香港人適應了很多New Normal(新常態),例如在家工作、外賣取代堂食等等。有見及此,陳惠玲計劃重新推出真空包裝的滷水食品及湯包,方便客人隨時在家中享用。「呢個產品其實我幾年前曾經做過展覽,好多人都鍾意,不過嗰時未有咁盛行。而家有真空包裝機,我哋係現場做,隨時都ready,當時投資咗都6位數字,我覺得唔好浪費。」

71年老字號,陪伴香港經歷幾個難關,在今次疫情下如何逆境生存,將是陳勤記的一大挑戰。

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner