龔成專訪|五年儲百萬 理財作家長揸比亞迪滾至千萬元 「輸得最多就係短炒嗰班!」

更新時間 (HKT): 2021.03.25 00:00

過去一年多隻美股動輒升數倍甚至百倍,完全改變市場觀念,很多人說股神畢菲特的「價值投資法」已是過氣產物,但在FB專頁擁有近20萬追蹤者的人氣財經書作者龔成,卻靠這個方法致富,十多年前憑住死慳死抵儲錢法,食足一個月10蚊碗雲吞麵,月儲1萬元並買入5萬股比亞迪(1211)持有至今,市值高達千萬元。

多年來他不只一股未賣,更不停增持,該股曾經跌至十多元低位,他的賬面身家更蒸發九成,但他深信長期價值投資比短炒更好,「我見輸得最多就係短炒嗰班」,結果目前股票組合已累積市值數千萬元,究竟有何理財心得?他不斷重複一句︰「最緊要儲錢先。」

「80後」的龔成稱自幼受父親感染,已有理財習慣,「父母已經身教,話畀我知錢唔係從天而降,見到佢放工會拎啲西裝返屋企做兼職。」於是他由小學起亦創業賺錢,例如執拾氣槍BB彈及炒賣閃卡,甚至組本地旅行團行山探險,「每人收1蚊咁,當時一星期賺幾十蚊,對於小朋友來講係好多零用錢。」

月入8,000儲1萬

慳錢理財法已在龔成腦袋留下烙印,直到剛踏出社會工作更慳得誇張,他透露當年畢業後任職銀行小職員,月薪只得8,000元,但卻定下5年要儲到100萬元的目標,「當時計過每個月要儲1萬元,5年本金有60萬,加埋投資滾存到100萬。」月入8,000元儲1萬元,對外人來說天方夜譚,龔成亦坦言,大部份人聽到這個目標,肯定會放棄或減少儲錢金額,但他卻多番強調本金的重要性,要想在短時間內「錢搵錢」,於是靠做兼職及慳錢來完成月儲1萬元目標,「去做私人補習,少啲見朋友,減少出街食飯支出,約去行山或公園傾偈,返工帶飯。26歲先第一次搭飛機去旅行。」不計家用,每月支出約2,000至3,000元,最激試過一個月支出低至700元,「當時金融海嘯大冧市,我唔係驚咗,而係想慳錢掃平貨,試過一個月每日lunch只食10蚊一碗嘅雲吞麵,點解咁慳?因為我知道呢一刻100蚊買到嘅股票,將來會增值到500蚊甚至1,000蚊。」連同兼職每月收入約1.3萬至1.5萬,靠着死慳死抵方法,加上炒股票,龔成用了4年半便提早完成儲得100萬元目標,他笑指現時仍然可以用死慳方法儲錢,「但我有冇必要呢而家?哈哈!」

兩年儲5萬股比亞迪

靠住100萬本金,經過逾10年的投資生涯,龔成透露目前已累積數千萬元身家,其中的關鍵,便是一注獨贏比亞迪,「頭5年儲錢嗰時,我買咗六福(590),1.4元買入,升咗1倍後賣咗,之後就將賺嘅錢買比亞迪,記得當時08至09年,買入價係十幾蚊,慢慢就儲咗5萬股。」他形容這5萬股比亞迪除了是他致富的關鍵之一,亦是學習儲錢的最佳例子,「我係以價值投資法去買股票,買咗就擺好耐都唔郁,我一路都講儲錢搵第一筆資金好重要,你唔計我而家開炒股班同埋出書,淨係計呢5萬股比亞迪,而家都值成1,000萬,所以行出第一步好重要,冇第一步就冇第二步。」他又透露,多年來一直增持比亞迪,從未沽出,目前持股較當年的5萬股更多。他認為現今的年輕人可以輕易複製其致富方程式,只要肯儲下第一筆資金:「我嘅方法其實人人都做到,而家5年賺100萬仲易過我當年啦。我寧願開始時好慳,等將來可以錢搵錢後先再舒服啲。」

薦買小米、金沙中國

他直言跟股神畢菲特的方法投資,每次會花6小時去分析一隻股票,甚至會實地視察該公司的營業情況,「買股票就係買間公司,好似六福我去十字路口睇佢門市,睇佢人流。」他認為,值得投資的公司,除了看營業情況,還要看前景、現金流以及獨特性,例如港交所(388)以及港鐵(066):「交所係獨市生意,就算政府點樣收稅,係有少少影響,但始終地位係不變,係最核心;又例如賭業,澳門賭場係好好賺,所以我有買金沙(1928),成個澳門得6個賭牌,疫情完咗就會好返。」除此之外,他又指出只要公司核心經營不變,便值得買入該股票,「我都有買必瘦站(1830),有個學生同我講佢而家就喺必瘦站返工,話疫情冇工開,仲笑我買呢隻股票,結果疫情好返少少,美容院重開,股價又升咗好多。」另外目前會長線持有的股票包括中生製藥(1177):「唔係因為肺炎買,幾年前已買入咗,覺得全球人口老化問題好嚴重,睇好醫藥方面嘅市場。」他又指去年中印邊境問題時買入小米(1810),並會長期持有,他解釋指:「小米過往增加幾快,睇到建立緊個平台,利用平價手機去搶佔市場,同時控制成本不錯,當搶佔市場份額後,平台建立得好,將來的盈利會增長好多,24元樓下買入的值博率會幾高。」

告戒勿短炒

除了價值投資以及花時間分析公司,他總結多年投資經驗,認為要學懂平常心,才能成為長勝將軍。他透露由99年開始炒股票,頭幾年只懂得短炒,甚至炒衍生工具:「成日total loss,儲完一筆錢又輸晒,每次輸幾萬,最尾輸到夠啦,唔再短炒,不過因為試過短炒,經歷過大起大跌,而家先至識平常心。」他指出自己經常教學生買入股票後不要經常看股價:「Delete咗個app最好!」因為大部份人買股票後的心理壓力太大,尤其是短炒人士,「個市震一震佢就沽貨,唔夠膽長期持有,好似比亞迪咁,我由十幾蚊至幾十蚊都有買,試過十幾蚊升到88蚊,又試過跌落12蚊,我成副身家蒸發咗九成,係好痛苦,幻想吓當時嘅心理質素要幾強?當時好多網友都笑我買比亞迪,話呢隻股票唔掂,但其實你知道間公司基本質素係好,尤其電動車市場有前景,股價跌幾多都唔怕。」他重申,並不是揸住某些股票過世,「如果佢基本因素變咗,都會持有一兩年就賣咗嘅。」龔成經常在FB回答讀者提問,大部份都是教人每月儲錢再投資,被連登討論區的網友笑他為「月供成」,只懂叫人月供盈富基金(2800),但他不以為意,只表示會繼續教人月供:「我自己就唔會月供嘅,因為我識得投資,揀股票要花好多時間去分析,因為我做咗銀行同證券10年,見到散戶都係輸錢多,如果你係有能力嘅投資者,自己識得揀股當然係好,但大部份散戶都唔識揀股。」

龔成5年前才辭去工作全職炒股,他又透露多年來在銀行及證券行工作,目睹大部份短炒客人均輸錢收場:「邊啲客係輸得最多?就係心急嗰班, 反而就越淡定就要係長線投資嗰班係最賺錢,心急客聽到某個消息就入市,個市震一震就好衝動即刻賣晒。」目前港人熱愛炒美股,尤其GME一役後,價值投資法好似變得不合時宜,龔成堅持自己只炒港股,「美股都值得買,不過我冇時間去睇,而家好多股票都升得好勁,例如新經濟股嘅美團(3960)咁,其實以我嘅價值投資法去睇,都會覺得呢啲公司值得投資;又例如Tesla咁,不過呢啲股票要計算佢嘅估值就比較困難,唔係唔買,係幾時買,好似比亞迪現價我都叫人唔好買住。新經濟股我覺得都要持有,但可以分散風險,最多以三分一資金去買。」

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner