笑到最後|怪獸股民的新常態(高明)

更新時間 (HKT): 2021.03.28 12:19
■虛擬貨幣Dogecoin曾單日升8倍,怪獸股民口號由GME to the moon,變成Doge to the moon。 互聯網圖片

「點解無啦啦股災?」

「廢老畢菲特」

「跌1%,走呀!」

「契媽—>女股神—>Cathie Wood—>阿木—>XX」

世紀升市引入大量新手股民,而呢一批新手股民,有一個特點,就係對下跌完全無法容忍,即使股價下跌幅度好低,或者連升10日後跌1日,都會上網咒罵曾經為佢哋帶嚟賬面財富嘅股票或者基金經理,例如Cathie Wood,可以喺三個交易日內,稱呼由契媽變成一個沒有品味詞語。呢種股民,姑且稱之為怪獸股民。

好似仔女考試拎98分俾老母打一樣,本來覺得呢類股民太過怪獸。但係,客觀嘅事實我哋又唔可以怪呢啲股民,高明雖然都有一定股齡,但係從來未遇過今日咁嘅局面:股票一日升一倍係慢,新晉加密貨幣可以升20至30倍。

上年美股升市有兩個時段可被稱為天降黃金雨,分別係8月及11月至1月。8月起因,係蘋果同Tesla拆細,最唔合理嘅原因,變持貨日日賺嘅源頭。到11月捱完跌浪,乜都升,喺任何一個時段入市,即使升幅隻隻唔同,亦未必係倍升,基本上毋須捱持貨等候,即買即升,嗰期應該養大咗所謂日頭賺港紙、夜晚賺美金嘅心態。

GameStop(GME)一生一次(YOLO)變成一個月炒一次,Bitcoin 2020年升4倍更加確認升幅常態化,未計其間無數升幅幾十倍以上嘅加密貨幣,喺所謂科技股股災之中,炒風無停過。所以唔能夠怪佢哋係怪獸股民,因慣咗一日升一倍係新常態,跑得慢已經等於輸,跌更加係冇可能接受。

噚日年輕人叫畢菲特做廢老,今日Cathie Wood同Elon Musk已經變成牛市股神,可以預期,可見將來股票將會同債券或黃金同級,廢老先炒股票(包括全球股票),真正玩家會炒加密貨幣、NFT,甚至其他更新嘅炒賣工具。

再睇世界走勢,印鈔已經過咗冇得返轉頭嘅時代,債息稍為上升都震到個市散,雖然冇可能日日升,但資產長期上升已經係肯定,唔係因為資產贏咗,而係現金輸大鑊,怪獸股民覺得贏少當輸,可能係投資世界嘅未來,最簡單聯儲局資產負債表2020年升咗76%,你嘅總資產升得少過呢個數,你嘅購買力已被溝淡。

高明

MeWe: https://bit.ly/2Y89PjV

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner