睇樓大JAY級|四球殘爛散上車盤 「竟然用生銹衣架拉住隻壞窗!」

更新時間 (HKT): 2021.04.02 00:00

樓市回春,香港最後上車樂園屯門區400萬元以下放盤陸續減少,截至3月底,放盤僅餘78個,比今年1月減少12%。經紀Dennis扭盡六壬力sell記者2個4球以下屯門私樓,其中一個實用320方呎的單位認真殘爛散,業主39年前一手買入持貨至今,仍然維持昔日1980年代的味道,木地板爛到徒手拎得起,廁所壞窗隨時掉落街,難怪單位叫價比銀行估價低28萬元或6.5%。

祥益地產資料,截至3月底,屯門區400萬元以下二手私樓放盤已減少至78個,比較今年1月份有89個放盤,減少11個或12%,其中置樂區一帶有不少4球以下放盤。由屯門市中心可乘穿梭巴士往來,如果經過屯門市廣場,向安定邨方向,約10分鐘步程。該處街市、食肆、日常生活所需一應俱全,是自成一角的小社區。

經紀Dennis帶記者睇的第一個4球以下放盤,大廈39年樓齡,入到大廈仍然需要行幾級樓梯方可乘坐升降機。單位實用面積269方呎,叫價380萬元。入屋客廳光猛,原則一房改做開放式。單位化過妝,髹過油,雖然遠望開揚山景,但同時樓下對正高速公路,都幾嘈。Dennis反駁:「其實而家你喺屋企睇YouTube、Netflix、Facebook,基本上你好少會理出面啲嘢,係咪先?再唔係你睇風景,唔開窗咪得!」廚房細,僅夠一人企,抽風機和洗衣機積累的塵成吋厚。Dennis解釋是裝修留低的塵。打開灶底櫃門,攝影師忍不住說:「好大陣好耐都冇打開嘅味。」另外,銹迹、霉菌佈滿廁所,廁所地板更有幾條裂痕。話就話化妝樓,但估計都要再花數萬元執執廚房和廁所。

業主叫價380萬元,但銀行估價才360萬元,估唔足喎?經紀Dennis話:「估唔足,咪要還返呢口價囉!畀票我,我有信心做到340萬至350萬元。3年後鬆綁,再換大啲單位。(一定升㗎?)買樓一定升㗎啦,磚頭一定保值,而家呢度比一年前已經升咗15%至20%,如果你出去打份工,每個月儲6至10萬先至賺到樓市升幅喎!所以有錢,學李嘉誠話齋趁早入市,自住嘅,有買貴冇買錯。(但有風水佬話樓價下跌!)你見蘇民峰、麥玲玲個個都買磚頭,有邊個風水師講完係唔買嘢,連李居明都買樓,佢哋教你擺完風水,最終佢都是係行去地產舖買樓。」小記那刻真的有被「sell郁」,好彩知道在返工,去睇第二個單位吧!

第二個單位是隔一條街的另一幢大廈,入大廈要行十幾級樓梯先坐到升降機,日日咁行都叫做咗運動。單位實用面積320方呎,一房間隔,業主一手買入持貨至今,揸足39年。入到單位全屋昏暗,坐到褪色的圓凳,地板鬆脫,其中一塊用手輕易反起,日後買入地板需要重鋪。

廚房和廁所牆身分別是粉藍和粉紅色磚,廁所在近天花位置無緣無故地有一個鐘,停留在12時55分,加上日子久了,人去樓空,瀰漫一股詭異的氣氛。全屋「大佬」就是廁所,當中大大隻字寫住「壞窗」,近看原來窗戶三分二的面積已鬆脫,目測看不到有任何支撐點,單用一個生銹的衣架去拉住壞窗,一定要找專業人士去處理。抬頭看,天花有一條大裂痕,就如有婚姻裂痕的夫婦,應該一敲即碎。廁所對出的油漆有滲水迹象,相信是浴缸滲水日積月累所致。如果說全屋「大佬」就是廁所,這單位下面就是「細佬」——買頭電掣,猶如坐時光機回到過去。估計重新裝修單位,簡單裝修都要10萬元或以上。

Dennis話:「業主開價397萬元,銀行估價425萬,業主留咗中間差價預咗畀你裝修,價錢已經反映質素。」年初至今,屋苑同類型單位成交由390萬元至420萬元,對上一個同面積單位成交價是420萬元,「業主開價開低差唔多30萬,呢個已經係一個好好嘅入市原因。」他又稱:「今日睇呢兩個單位都低過估價,逢周末都必走,如果決定唔夠快,轉頭會俾人買咗。殘爛散單位,好多買家都會接受,因為唔鍾意原本裝修,仲可以同業主傾5%至10%,用來全屋大裝修,到時想點裝,悉隨尊便。」他補充,首置客最常問首期、入息要求、供款、擔保人、樓齡、交通及周邊配套,這些殘爛散往往是他們的選擇,「對好多人來講,二、三十萬可能唔係好大影響,但對年青人可能已是一、兩年積蓄,所以屯門4球以下放盤一直都有市場,呢啲單位今周末賣唔出,下個禮拜就沽出。400萬元以下放盤已經所剩無幾。要樓齡新?有,龍床盤囉。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner