BizStarter | FinTech界「半澤」 搞免費配對貸款 「創業令我地獄上返天堂」

更新時間 (HKT): 2021.04.02 00:00

日劇《半澤直樹》中,有堺雅人飾演一個對金融業充滿熱誠的銀行家。現實中,香港亦有金融從業員,希望透過創業,嘗試去改變金融業既有遊戲規則,推出免費貸款配對平台,冀助中小企捱過經濟艱難時間,FinMonster聯合創辦人鄭文耀解釋,「我哋都知有好多公司,要比錢中介先可以攞到financing,可能講緊10%或者20%。要喺一個窮人身上攞錢,先至可以畀到錢佢周轉,其實我哋覺得唔fair。」

鄭文耀及陳健明,2017年決定唔打銀行工,與人合資成立金融平台FinMonster,並會為中小企提供融資配對服務,企業輸入資料後,平台會即時篩選出最合適的銀行經理,鄭文耀解釋,「大家有開銀行戶口去借貸嘅時候,都會有個好大嘅問題,就係話我應該搵邊一個啦?甚至你walk-in去銀行,其實可能會俾人當波咁傳嚟傳去,廢時失事,可能你開個戶口要六至八個禮拜,做個貸款要三個月。經我哋,最快一至兩個禮拜已經可以complete晒。」簡而言至,即類似貸款中介,但其與中介最大分別,是平台不收中介費用。

推免費服務,源於不希望於窮人身上賺錢。疫情令不少中小企周轉不靈,「我自己最深刻就係,有啲客打畀我哋,疫情令生意變零,cash flow可能得返一個月,就問我地點樣可以解決呢個問題。原來香港咁發達嘅金融中心,一間中小企佢想去攞financing,但原來佢冇渠道或者冇資訊去解決佢嘅問題。」他表示,該企業最終亦經其平台獲得貸款,「當然個銀碼無咁理想,因為始終疫情底下,但最少夠佢支持一段時間。 」

當然,作為一間初創,錢當然要搵,但要搵就要從有錢的機構身上搵。融資配對服務以外,公司同時以訂閱制形式,向大型機構供應發票管理系統,亦有與數據公司Refinitiv合作,向企業提供市場情報,包括貸款數據、收購合併等,「之前有大家聽過恆大(債務問題)喇,呢啲新聞喺報紙出之前,其實喺我哋平台已經知道曬。呢啲服務其實可以幫企業,知道佢哋做緊嘅貸款係咪一個fair price。如果佢哋啲交易對手,原來係違約公司,咁你可以早啲alert到,就可以避免損失。」他表示,公司目前經營模式,是希望借月費收入,去支持免費服務,「從而令到真正有需要嘅人,可以免費得到幫助。」長遠而言,希望成為銀行的合作夥伴。

經營金融科技,需要大量資金投入,目前公司未有接受任何注資,純粹靠燒創辦人投入的原始資本,一燒至今已燒7位數字,「我哋捱唔捱到我哋唔知,但過去一年唔同嘅product,發現係有需求,但係從來無人做過。好似你咁講,唔賺錢係冇人做,但係我哋就願意犧牲我地自己一啲時間,或者啲金錢去換將來更加多嘅利益。」

他表示,對香港金融業最終願景,是希望可達至普惠金融,令金融業不再與大眾,處一個不對等的局面。要達至此理想,似乎異想天開,「《半澤直樹》入面,有一點我好同意,就係作為一個金融體系,應該係好似以前銀行,你要facilitate成個經濟,令佢更加蓬勃。如果你利用呢個制度,或者利用銀行體系謀取私利,其實係本末倒置。」

鄭文耀及陳健明,由安穩的中環銀行人,變成數碼港的Startup人,兩人坦言當中經過一段適應期。鄭更已為創業賣樓,由住九龍塘搬到屯門,「我哋以前中環返工,著得靚一靚,食嘢食得好,搭車我哋搭的士。依家創業,又要用自己錢去幫公司,有啲人會話你喺天堂跌落地獄,但我自己感覺係由地獄上返天堂。喺中環返工可能有多物質嘅享受,但我做緊嘅嘢其實係幫緊人,係做緊未來嘅事,而打工,只係做緊現在嘅事。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner