創業起義|班港督泉下有知 會對移英港人講啲乜?(尹思哲)

更新時間 (HKT): 2021.04.03 15:29

適逢復活節遇上清明節,地府也大肆解封,不再lockdown,好讓亡魂可以放鬆一下。

就連在冥界生活的昔日港督們,也私自辦了個閉門派對,齊集於首任砵甸乍的府上。

砵甸乍:「歡迎歡迎,大家都曾任港督一職,份屬同僚,情如手足,就不必拘謹,舞照跳,馬照跑,酒照飲!」

酒過三巡,葛量洪問:「大家喺陰曹地府,仲有冇留意地上香港消息?」

尤德呷住威士忌:「近半年,好多港人移民我大英祖國,到英倫本島落地生根。」

羅富國:「你心臟唔好就飲少啲啦。移民單嘢,係咪彭定康個「千古罪人」搞出嚟㗎,哈哈!」

麥當勞:「叫子孫燒個蘋果App畀你啦,多啲留意吓新聞,係因為波仔搞咗個BNO Visa呀!」

尤德:「唔係當年戴卓爾傾唔掂,搞到香港要收返,我要起東隧、大老山隊道、起輕鐵,嚟去到挽救信心,但都於事無補。」

司徒拔:「當年鄧蓮如李鵬飛講到流牙血,都係得5萬個左右名額,今時今日,竟然幾百萬人有資格嚟我大英!真係難以置信!」

梅含理:「咪係!想當年我一上任,就差啲遇刺!唔係個殺手水皮,我早早落咗嚟喇。嗰時香港人唔鍾意我地,可能嬲我禁止佢哋用大清啲貨幣,總之就諸多不滿啦!」

柏立基:「仲大清?改朝換代好耐喇喎。」

梅含理:「咁係吖嘛。為咗大英嘅形象,當年我臨走,特登釋放咗個殺手,仲大拿拿送咗10蚊畀佢㗎!」

司徒拔:「而家做港督正好多!唔好話行刺或彈劾,就算批評同唱衰,都可以捉咗先講,開庭嗰陣,又可以派個律師畀佢,爽到呢!」

梅含理:「咁樣管咪有效率喎,睇返我哋大英,國力如今就一落千丈喇!」

尤德:「梅含理你做過警隊一哥,惹落咁多仇家,司徒拔你用戒嚴對付省港大罷工,搞到又擠提又冧市,你兩個唔識就唔好亂噏啦。」

麥理浩:「其實正係因為國力,至要接納返香港人吖嘛。香港人唔止有錢,做嘢又勤力,又識轉彎,其實比唔少英國人精明得多!如果可以融入英國發揮所長,實乃我地大英之女女皇之福呀。」

尹思哲

http://linkedin.com/in/wanszezit

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner