李華華Online|國泰高層薪酬明減暗補 有董事減得少過員工

更新時間 (HKT): 2021.04.07 21:45

上年疫情大爆發令航空業蕭條,大部分飛機曬太陽,國泰(293)要四出撲水,大部分員工都要變相減薪11.5%。高層都以身作則帶頭減薪兩至三成,不過計埋其他福利,有董事實際上減得少過員工。

國泰上年希望員工放兩輪自願無薪假,前後6星期,變相全年減薪11.5%。高層當然帶頭參與,名義上減薪17%,四月至年尾再減薪9個月,即係主席同行政總裁減薪30%,其他董事減20至25%,不過只係減「基本薪金」。國泰公布2020年年報,顯示董事整體底薪的確減少咗15.6%,總共支出1,710萬元,但實際上仲有花紅、津貼、退休計劃供款、房屋福利等等,減幅無想像咁多。

頭5大高層整體薪酬入面,都只係減少11.9%,尚算同員工睇齊,但咁樣共渡時艱又未免易咗少少,營運及航空服務總裁韓兆傑就最輕鬆,減幅竟然唔夠一成,年收1,030萬元,成為全集團最好待遇一位。剛剛轉去母企太古做CFO嘅馬天偉就排第二,都有908萬薪酬,2019年臨危受命嘅CEO鄧健榮就排第三,有成813萬。

疫下派巨額花紅

如果用所有董事總薪酬計,實際上減幅只係少9.3%,當中花紅支出過千萬,大增78%!華華仔細去睇,其實花紅入面有唔少係屬於2019年已經黯然下台嘅前CEO何杲同顧客及商務總裁盧家培,屬於延後發放,現有董事實際花紅有幾多,睇怕要比較埋出年條數先知。

話時話,疫情之下機師仍然好有競爭力,上年年薪過百萬嘅飛行人員有成1,066個,比2019多出七成咁多,年薪超過550萬嘅,亦都由1個增加到2個。不過10月嗰陣國泰大裁員,留低嘅都要焗簽加辣條款,待遇少一截,今年百萬俱樂部成員應該會大減。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner