智取大市|靠績優股捱上落市(晉佳)

更新時間 (HKT): 2021.04.08 18:12

Naspers沽騰訊(700)以上限定價,照計個市好好挾,最終大市只係挾咗半日,由於大家太過習慣港股上落市玩法,於是抽高半日之後就想拿拿臨獲利,連「日升日跌」都冇得你玩。正正喺中午收市之前,麵神出嚟話港股跌唔落,問你怕未。

短線市底唔算強,但有一個好有趣嘅現象,建滔孖寶明明本身唔發首季業績,但就發首季盈喜,方法係「建滔集團預計截至2021年3月31日止3個月的純利將較2020年6月30日止6個月增長超過100%」,用今年首季高峯表現去同舊年上半年低基數比較,估計呢類盈喜陸續有來,有部份首季盈喜股受刺激股價可挾一轉,但亦要提防個別股份藉此挾高準備配股。

績優股自然喺上落市之中形成護城河,九毛九(9922)早前公佈全年業績,下半年經調整純利2.3億元人民幣,旗下太二酸菜魚下半年按年勁增長75%,年度化市盈率83倍好似貴到得人驚,實情係太二酸菜魚保持增長之餘,亦繼續享有較高經營槓桿,如果roll over去正常化嘅2021年業績,市盈率將大幅降低到正常嘅增長股水平。

仲有一單少人提及嘅公告,就係九毛九喺業績前公佈投資不低於5億元人民幣,喺3年內建設一個多功能全國供應鏈中心基地,呢類deal證明公司對於開舖同收入增長前景信心十足,驚死生意唔夠做咁,曲線為未來幾年增長寫包單。與此同時,該項目能夠為九毛九提供穩定貨源同控制成本,對於保持質素同提升毛利率有一定作用。

目前九毛九市值450億元,只係增長逐漸飽和嘅海底撈(6862)嘅六分之一,兩者仲有市值收窄空間。而喺上落市當中,九毛九雖然貴,但起碼有合理兼能見度高嘅預測PE喺眼前,上落市緩緩地大漲小回,回報反而有機會比一般新經濟股高,同時又坐得相對安心。

晉佳

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner