華爾街戰線|直擊炒鬼之日常 27歲仔「不務正業」一年贏6球

更新時間 (HKT): 2021.04.08 00:00

喺Facebook上面掛着一個柴犬icon,自稱Shiba的90後貼出富途真倉,由去年3月的30萬港紙,炒到身家有逾600萬元,這張成績表吸引數以百計的散戶每月課金1,000蚊睇直播炒股,甚至近萬元的課程都收過百人爆滿。全職day trader的他自小就已經「不務正業」開始炒iPhone、炒紀念鈔、炒股,直到27歲都未打過工,究竟全職炒股生活係點?秒秒鐘幾十萬蚊上落?定三更窮五更富?記者同Shiba約好拍足全日,全程直擊炒鬼的日常。

訪問當日的朝早搭正9點,Shiba已經坐定定於3呎長的電腦螢幕前迎接港股競價,一邊望着報價,一邊說︰「噚晚有單大陸電子煙管制政策,美股隻RLX(霧芯科技)冧咗,今日睇吓隻6969(思摩爾)。」Shiba隨即在早段思摩爾(6969)反彈之際,於42元入市,44.8元及44元分注沽出,短短一兩分鐘,賺到34,000元。

30萬炒到上600萬

隨後的整個上午,Shiba再沒有出過手,只是檢視自己剛才落注唔夠大,惟有等到下一個值博的機會出現。與想像中的day trader不同,Shiba極其「揀擇」地出手,「希望做winning rate高嘅trade」,寧願瞓晏覺、叫外賣、睇YouTube度過整個港股時段。

Shiba形容自己近年會等機會出現,而非主動搵位博,擺低經常贏完又輸返的期貨、牛熊證、期權,自上年3月開始「慢慢地」由30萬炒起,最多試過在GameStop一役單日贏過百萬元。他習慣將部份賺到的錢擺在銀行,避免自己沖昏頭腦,由他提供的倉位截圖所見,其戶口由上年30萬元左右,其間出出入入,銀行加上證券戶口資產有近600萬元。

技術心態思維 缺一不可

去到呢度,可能有人會問的是炒即日同賭一蚊上落有幾大分別?Shiba認為能夠搵到方法,以一個較高勝率去贏是最大分別。問到有無一兩招必勝方法,Shiba就帶記者回到他心中所想——技術、心態、思維缺一不可。他指︰「當你睇夠1萬張圖、2萬張圖去day trade,每日都有足夠sample size知道件事work唔work。」而能否成為贏家很在乎心態,包括注碼控制、贏谷輸縮 、嚴守止蝕等老生常談,才能走得遠。

記者在旁睇足全日,Shiba的電腦畫面上除了VWAP外,沒有任何技術指標,亦沒有甚麼高深的方程式或AI輔助,而是將重點放在5分鐘圖的形態,配合一套方法捕捉股價上落轉折的瞬間,一種momentum trade。

時間去到美股盤前4點開市,才是炒即日的主要戰場,畢竟市場深度及交易成本都遠優勝於港股。Shiba笑言雖然自己不務正業,「不過如果當炒股係一份工,其實係另一種辛苦,而且永遠唔知月尾贏定輸又係另一重壓力。」

教人炒股月賺幾十萬

當然炒股不是他收入的全部,加上直播及開班教學,月入隨時以數以十萬計。「瑞士山區肺」的嫌疑隨即而來,莫非真的會賺夠想畀其他人賺?Shiba坦言︰「教人炒股係一份無風險收入,但股票市場咁大,唔會我幫咗你就會令我賺少啲。」他又強調自己首先是一個炒家,或者換句說話有朝一日炒唔掂,觀眾自然會離去。

講講吓,密集鍵盤敲打聲加上幾下滑鼠滴答聲,又過了5分鐘,因錯判Tesla盤前走勢,Shiba將今朝所得倒輸出去。對於按幾個掣可以賺幾十萬元,同時亦會輸幾十萬元,Shiba直指股票對他而言沒有價值,「見到人返工會覺得自己做嘅嘢好唔真實,甚至見銀行戶口都只係數字。」直至幾時會炒到收手?他指眼前目標是5,000萬元,但不會完全從此不沾手股票,只是全職做day trader有時限,搵夠錢就會去「尋找人生意義」。

炒家只得一條命

例牌問題是︰層樓租定買?答︰是租的。再問就是當中分散風險的考慮,Shiba指樓價貴,未必想將錢全部放在香港,講講吓諗到將筆錢抽新股又好,炒又好,都勝過買樓的回報,所以都不了了之。而自認「無乜投資經驗」的炒鬼反問記者一句而家興投資甚麼,無論Bitcoin定手錶都不覺吸引。

踏入晚上9點半,亦即「炒」了12個小時,才到美股開live直播教學環節,早已習慣一路講一路trade的Shiba,第一句就在咪前直認「盤前輸咗千幾蚊畀tesla,我而家要做嘅就係睇吓今日咩思維要諗……」一直到凌晨12點或1點,視乎市況而言。

而當日埋單計數,Shiba輸8,616美元亦不面容不改,熄機熄燈等聽日再嚟過,執行「限制自己一個可以輸的數字,day trade可以比過夜更低風險」。最後的假設性問題,如果輸晒所有錢點算?Shiba說:「輸就真係輸晒,屋企最多都可以畀碗飽飯食。」而整日的訪問中他經常掛在口邊的是這一句︰「炒家只得一條命,輸咗無人會畀錢你再嚟過。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner