智取大市|阿里步內房內銀後塵 (晉佳)

更新時間 (HKT): 2021.04.11 19:38

阿里巴巴 (9988)被判反壟斷罰款,佔2019年境內銷售額4%,或者係當年盈利不足七分之一,數字上未算太入肉,佢錢多的是。市場上面有人覺得壞消息已出,有利今後股價,又有人話中央唔會就咁輕易放過阿里,大家都係估估下。與其估估下,不如深入啲睇成件事,分析中央嘅佈局,同埋件事帶嚟嘅深遠影響。

先睇一睇中央之前定下嘅反壟斷法主要罰則,金額係上一年度銷售額1%以上10%以下,阿里今次判罰佔2019年阿里境內銷售額嘅4%,而唔係肇事業務收入嘅4%,意義上罰得唔算輕,未來要罰,估計以收入4%上下為準,唔多過5%,估計係唔想對市場有太大衝擊。

被罰一次,亦唔代表冇第二次,中央要罰,理由多的是,目前已經打開缺口。科技行業龍頭要更循規蹈矩,只能間中偷吓雞博大霧,十足多年來嘅內房同內銀一樣,如果玩過籠就用反壟斷罰款去「調控」一下。判罰金額出咗,對阿里嚟講唔係好事,證明中央認為阿里夠肥去劏,更曲線證明中央認為阿里增長階段已八八九九,已經進入成熟企業。對小弟嚟講,呢個意義更大,因為中央唔會無緣無故喺一間未養肥嘅企業身上「收成」。

仲要留意嘅係CCASS,上一次花旗喺11月5日由美國搬倉5.82%阿里股份到香港,阿里股價就開始弱勢到而家,去到3月23日花旗持倉沽咗近5%,去到8.51%,跟住3月24日再搬倉9.28%嚟香港。而家新一次搬倉只係過咗十幾日,適逢反壟斷法判罰金額啱啱出爐,斷估阿里沽壓仲未停止。

曲線證明騰訊仍有增長

如果以騰訊(700)個案嚟講,假如有一日被罰收入嘅4%,以2020年計,就相當於純利嘅六分之一左右,數字上同樣影響唔算太大,而今次阿里先罰而騰訊未有類似消息,或許中央仲覺得騰訊盈利有上升空間,未係時候劏。

換轉美團(3690)就唔同了,真係罰起上嚟,2020年收入4%相當於全年嘅非調整EBITDA,影響重大。不過,美團好有先見之明地喺新業務不斷燒錢,甚至燒到打亂章,目的係先懲罰自己都好過阿爺嚟懲罰佢,佢「承諾」未來數季繼續蝕錢,其實係好讓投資者放下心頭大石,真係諷刺。喺反壟斷法層面上,相對安全嘅當然係京東(9618)同快手(1024),至少唔係行業一哥。

逆派餅周期 不利港股

再宏觀啲去睇大市,綜合上述分析,估計今次阿里判罰,中期都係令科指受壓嘅因素。習大大上場後,2015年收緊兩融、人幣一次性貶值同埋熔斷,形成股市三連跌市;2018年打擊華融同埋醫藥、教育行業,而今時今日港股加印花稅、嚴查深房理去到阿里判罰,好明顯係中央逆派餅周期嘅中段。

中央綜合咗上兩次嘅經驗,只會一次比一次聰明,今次當然唔會好似2015年咁樣,個個部門發脾氣式搞冧股市,但今次行軍似乎比2018年更加快刀斬亂麻,今次港股加印花稅,同埋郭樹清話美股泡沫,足證中央針對嘅係境內資金流出海外投資,喺呢個逆派餅周期,港股首當其衝,將繼續比A股同美股更弱,投資者有之前經驗下,反彈市相信更加弱,大家睇路了。

順帶一提,小弟將會重新update facebook賬戶,稍後亦會開設IG賬號,將會有更多即時、長線嘅分析部署可以睇,有興趣嘅話不妨留意了。

晉佳

https://www.facebook.com/advanceguy1

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner