【笑到最後】未來Big Tech概念曝光 - 高明

更新時間 (HKT): 2021.04.12 02:00
■Coinbase今個星期三上市,推斷上市市值達1,100億美元,大過紐交所 (659億美元)加埋納斯達克(257億美元)。 資料圖片

加密貨幣交易所Coinbase今個星期三將會上市,上市前合約交易推斷上市市值達1,100億美元,未上市已經係大市值公司,幾樣特徵加埋可以肯定,下一代FAANG肯定會同加密貨幣有關。

同舊年冇盈利嘅IPO唔同, Coinbase已經賺緊錢,上市前公佈第一季業績預告,收益已經達18億美元,盈利係有7.3億美元至8億美元。比較「同業」, Coinbase係交易所,現時市值已經達1,100億美元,就係用美元計算嘅交易所,包括紐交所同埋納斯達克,市值分別係659億美元以及257億美元。股票交易所歷史過百年,就算納斯達克70年代開始計,亦都發展咗一段長時間,反而Coinbase 2012年創辦,僅僅10年已經超越股票交易所市值,將來再發展落去肯定變得更大。

兩間合共接近千億嘅美國交易所,製造咗幾間過萬億市值嘅上市公司。一個新興加密貨幣交易所,已經等於原有兩間有找,未來從加密貨幣衍生出嚟嘅概念,將會有機會成為下一浪嘅Big Tech。至於係乜嘢,掘礦股類似江西銅(358)之類資源股,應該唔係,可能係一啲好容易用加密貨幣交易嘅方式。大家可能會問,PayPal同Square有Bitcoin業務,算唔算係?但兩者業務本質係美元,有啲似油動車公司出部電動車跟潮流。Coinbase有出Visa卡,都係支付概念,但感覺上好似仲未係。

情況有如2000年代,當年大家仲係專注應用業務,少數公司掌握業務帶嚟嘅數據,今日已經成為Big Tech。今代Big Tech太強勁,要取而代之需要時間,下一代究竟係點仲未成形,但係Coinbase上市,至少提咗水,下一代肯定同加密貨幣有關。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner