【智取大市】阿里衰在人老花黃 - 晉佳

更新時間 (HKT): 2021.04.12 02:00
■阿里巴巴被判反壟斷罰款,曲線證明中央認為阿里增長階段已八八九九,已經進入成熟企業。斷估阿里沽壓仲未停止。 資料圖片

阿里巴巴 (9988)被判反壟斷罰款,佔2019年境內銷售額4%,或者係當年盈利不足七分之一,數字上未算太入肉。先睇一睇中央之前定下嘅反壟斷法主要罰則,金額係上一年度銷售額1%以上10%以下,阿里今次判罰佔2019年阿里境內銷售額嘅4%,而唔係肇事業務收入嘅4%,意義上罰得唔算輕,未來要罰,估計以收入4%上下為準,唔多過5%,估計係唔想對市場有太大衝擊。

被罰一次,亦唔代表冇第二次,中央要罰,理由多的是,目前已經打開缺口。判罰金額出咗,對阿里嚟講唔係好事,證明中央認為阿里夠肥去劏,更曲線證明中央認為阿里增長階段已八八九九,已經進入成熟企業。對小弟嚟講,呢個意義更大,因為中央唔會無緣無故喺一間未養肥嘅企業身上「收成」。

仲要留意嘅係CCASS,上一次花旗喺11月5日由美國搬倉5.82%阿里股份到香港,阿里股價就開始弱勢到𠵱家,去到3月23日花旗持倉沽咗近5%,去到8.51%,跟住3月24日再搬倉9.28%嚟香港。𠵱家新一次搬倉只係過咗十幾日,適逢反壟斷法判罰金額啱啱出爐,斷估阿里沽壓仲未停止。

最後一提,小弟將會重新update facebook賬戶,稍後亦會開設IG賬號,有興趣嘅話不妨留意。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner