阿里被罰 專家:勿急撈底

更新時間 (HKT): 2021.04.12 02:00
■阿里壞消息似乎盡出,惟專家持觀望態度。

【本報訊】由螞蟻上市被叫停、反壟斷法的調查、立法,到終於被罰,這半年間阿里巴巴(9988)股價由高位309元反覆向下至上周五218元,隨阿里昨日出通告,這段「政策風險」似乎告一段落,但股價下瀉是否完結仍言之尚早,專家認為不值得冒險嘗試撈底。

「重倉科技股非好選擇」

阿里巴巴因「二揀一」觸犯內地反壟斷法,被罰款216億元,昨日於港交所出通告公佈內地「反壟斷調查行政處罰決定書」,內容與上周六無異。短線的壞消息出盡,似乎有博反彈空間。

耀才證券研究部副經理譚智樂勸阻心急入市的散戶,「雖然高位跌咗好多,但又唔係殘得好誇張,而且俾人罰錢都拖累得今年整體盈利好大,冇必要心急買」。

譚智樂以阿里接受反壟斷調查的最低位207元作入市指標,「等佢真係企得穩先追,如果你見207蚊都失守就唔好去博,唔好太介意幾蚊波幅,而且你唔知內地會唔會有更多整頓」。

他認為不單止阿里,其他科技股都不值得博反彈,他解釋今年科技股跑輸大市,短線科技股未成氣候,「今年冇再盲目追科技股,今年炒經濟復蘇,騰訊(700)、美團(3690)呢類股唔算貴得好緊要,但都唔係平,你仲重倉呢啲科技股未必係好選擇」。

上周幾隻重磅恒生指數、科技指數成份股的美股ADR各自發展,與港收市比較,騰訊、阿里齊跌0.4%,騰訊失620元關口報617元,阿里報217.1元;友邦升0.4%、美團升2.4%。

另外,本周中國會發佈GDP、出入口數據,美國則有包括鮑威爾在內的多名美聯儲官員講話。

關心你飯碗,貼近你生活,即Like「蘋果ATM」FB專頁!
BannerBanner