【操盤手札記】「罰即愛護」新炒法 - 割柑人

更新時間 (HKT): 2021.04.13 02:00
■阿里呢半年來當黑,創辦人馬雲行蹤成謎。 資料圖片

BAT呢期當黑,先講B—百度(9888),3月23日在港掛牌以嚟,只得首日守住招股價252元,迄今累跌16.7%。至於A—阿里巴巴(9988),因涉「二選一」壟斷,上周六被重罰破紀錄182.28億元人民幣。講到T—騰訊(700),則大股東Naspers上周三收市後宣佈減持,掟貨逾千億元。

當中,阿里最黑。上年11月旗下螞蟻上市被煞停,上年12月同今年3月又被指涉壟斷,兩度被罰50萬元人民幣,創辦人馬雲行蹤成謎。上月《華爾街日報》指,中央擔心馬雲輿論影響力,促其出售傳媒;上周五《金融時報》又指,馬雲牽頭創辦嘅湖畔大學被禁招生,以削其影響力。

據講湖畔大學招聚一班中國頂尖企業家,部份高官視之為精英集中地,有昔日黃埔軍校影子,擔心影響黨嘅領導。令人想起2019年中,《南華早報》報道,李嘉誠被其創辦嘅汕頭大學排除在外(sidelined),李家喺該校嘅影響力沒落(wane)。大孖沙辦學,隨時踩到國家紅線!

阿里受罰,靴子落地,券商則意見分歧,有指可緩解反壟斷調查壓力,罰則又可作科企參照;亦有指反壟斷行動冇咁快完。事實上,外電報道,市監局正增聘人手,加強反壟斷調查。聽券商講,不如聽吓官媒點講,《人民日報》就話:「處罰阿里巴巴……扯袖子也是一種愛護。」

阿里喺「處罰也是愛護」,兼且一來罰款雖巨,未算入肉,二來電商反壟斷、金融科技合規兩大監管風險除去一瓣下,昨日反彈6.5%。不過,科技股未擺脫反壟斷陰霾。下個受罰是誰?處於主導地位嘅大型互聯網平台,如騰訊、美團(3690)係大熱。想買科技股巨頭,不妨等待當局對其「處罰、愛護」未遲。

割柑人

關心你飯碗,貼近你生活,即Like「蘋果ATM」FB專頁!
BannerBanner