李華華Online|車壇猛人重出江湖 加入停牌仙股搞邊科?

更新時間 (HKT): 2021.04.15 22:02
當年大發汽車。

停牌超過7個月嘅仙股中創環球(1678)今日委任胡明哲及胡明法兩兄弟為公司執行董事,為期3年。翻查資料,原來胡明法「大有來頭」,佢曾經擔任華利資源(1215,現稱開源控股)董事,2002年因為利用虛假貨運文件,訛稱進行汽車零件買賣,向多間銀行騙取信用狀貸款近5,000萬元。被裁定15項促致有價產權書簽立罪成,被判入獄5年,服刑期間再承認一項串謀詐騙罪,胡明法亦因此被除去華利董事職銜。

上述涉事嘅人物同公司,怕且要股齡超過廿年才會有啲印象。其實胡氏兩兄弟喺車壇略有名氣,因為其父為已故嘅胡曉照,係80至90年代叱咤一時嘅本地車壇紅人,曾係大發汽車(香港)主席,代理日本汽車大發(Daihatsu)。

公告當然冇提及上述資料啦,只係強調兩兄弟喺經營汽車業務好有經驗,但據中創2018年報,提及公司做家居裝飾產品同電壁爐,同汽車風馬牛不相及。莫非公司諗住轉型?中創因為出唔到2019年業績,自2020年9月已停牌至今,子公司已被勒令清盤,大股東嘅股份又因為抵押被接管,依家被接管人待價而沽。

睇返上市條例,冇規定有案底嘅人士唔可以擔任上市公司主席或董事,但必須向港交所(388)申報,判定該人士係咪適合擔任。計計條數,胡明法應該一早服刑完畢,而且仲好努力進修。據公告所指,胡明法現為港大法學博士學位候選人。有報道曾提及佢近年仍活躍於汽車市場,事隔十幾年,今次兩兄弟拍住上,再次出任上市公司董事,唔知會有咩新搞作呢?

----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner