【信里一城】由炒家到搭上大老闆 - 小師兄

更新時間 (HKT): 2021.04.15 02:00
■經紀三類人,懶的就等客,勤力的就cold call,醒的就搵老闆,如果又勤力又醒,就上岸。 資料圖片

經紀三類人,懶的就等客,勤力的就cold call,醒的就搵老闆,如果又勤力又醒,就似經紀T一樣,上岸。早年經紀T靠住湊炒家出入貨,在號稱收入最不穩定的行業裏頭,獲得穩定的收入,但辣招趕絕炒家後,定律終歸難打破,收入還是不穩定。

炒家絕迹後,經紀T密謀埋「大老闆」的身,就是那些動輒可以購入全幢物業、地皮、商場以至整個停車場的老闆。經紀T說,大老闆日理萬機,秒秒鐘幾百億上落,哪有時間睬你經紀,出入貨好多時是他左右手、頭馬做篩選,所以要埋老闆身,先埋他的頭馬。這些頭馬周身刀張張利,面對頭馬,千祈咪識少少扮代表,因為講多秒只反映知識少。

經紀T講到,他成功埋到某物業大王的身,源於他溝到大王身邊一名頭馬。這位頭馬有點駝背,經常手持舊式公事包及穿其樂皮鞋,是其貌不揚的老伯,任誰也沒有興趣關注。經紀T私底下約老伯食飯,並於飯局時坦言:「有機會嘅話,希望關照吓,畀碗飯食。」結果經紀T成功估中,老伯不單止是老臣子,還是太傳,輔助繼承者。飯後一個月,老伯叫經紀T提供觀塘工廈資料,最終其公司購入一幢工廈,作價約1億元。其後,物業升值1倍幫大老闆賺了錢後,經紀T得以同大老闆同枱食飯傾閒偈。目前經紀T是該大老闆的御用經紀之一。

小師兄

fb.com/siuching28

關心你飯碗,貼近你生活,即Like「蘋果ATM」FB專頁!
BannerBanner