裝修爛尾|直擊爛茸茸木板遮屎渠惡臭難頂 業主呻「信錯朋友」 介紹黑店損失70萬

更新時間 (HKT): 2021.04.16 00:00

這是一個被朋友出賣兼裝修爛尾的真實個案。苦主陳太結婚買樓花70萬元裝修單位,誤信朋友而聘用「XX創意室內設計」公司進行全屋大裝修,原定去年11月完工,到今年3月了,房間地台爛茸茸,露出一條條藏喉的坑,好比一個陷阱。廁所未裝馬桶,以木板遮屎渠,難掩惡臭。她嘗試尋找裝修公司負責人W先生,卻完全潛水。細查之下,原來這位W先生牽涉多宗欠薪及走數事件,那刻陳太覺得「死囉!真係中咗招,俾呢間公司呃咗啲錢唔知去咗邊。」

陳太獲家人資助買入一個實用約900方呎住宅單位,透過相識多時的朋友介紹「XX創意室內設計」,報價60萬至70萬元,沒有選用貴價材料,沒有特別設計安裝,查過市價,算是合理,「6月報價催過我兩次,話來緊有新工程,問係咪真係做,如果係,就可以安排好時間。聽佢咁講,咦,佢公司有唔同工程喎,應該信得過。」

於是她與該裝修公司負責人W先生簽訂合約,施工期為去年7月至11月,施工3個月後,她心想應該七七八八,到單位看看進展,結果「地磚未做掃口,主人房未鋪木地板,一啲傢俬都未傾過,油漆未開始,牆身仲見到係石屎牆未批盪未批灰,假天花、木殼乜都未做。當時諗11月真係無可能完成到,但當時我已經畀咗9成錢,60幾萬。」一次過支付9成錢是因為朋友介紹,完全沒有想過這位朋友會欺騙她。當時W先生以疫情、工人需要隔離為理由,停工兩星期,「我當時信咗,無懷疑佢。」然而工程一拖再拖,「10月起我開始緊張,一個禮拜有3日上去單位,發現單位唔係日日有工人,開始更加擔心。問佢(W先生)點解,佢就拖你話聽日會有、聽日會有,但最後都未有。日日追問,遲遲唔覆」。

陳太搵返介紹W先生的朋友追問,「佢叫我繼續信佢(W先生)。嗰刻我只能揀相信,因為識咗佢(介紹人)咁多年,無諗過會呃我,惟有繼續信。」而且W先生透過WhatsApp提出:「同意12月15日後,工程還沒有完成,承諾每天賠償1,500元作為補償」,還寫道:「WhatsApp的承諾是合約上的文件,有同等效力。」在這個誘因下,陳太選擇繼續相信。然而今年1月仍無大進展,她感覺越來越唔對路,「去年9月已經話買冷氣,打去冷氣公司問,發現原來無畀過錢買。其實12月我已經好焦急,因為打算聖誕可以住新屋,但佢(W先生)話信最後一次,都信埋啦,佢都meet唔到deadline,我已經好絕望,好擔心,覺得自己就俾人呃咗。」她開始上網搜尋這間裝修公司的資料,發現去年5月曾經因為無法清償債務而被勞工處指有足夠理由提出清盤呈請,「嗰刻我覺得死囉,真係中咗招,俾呢間公司呃咗啲錢唔知去咗邊。」其後已經與W先生失聯,他亦潛水。

買樓超過半年都未能入伙,邊等邊租樓不是辦法,她向律師朋友諮詢,建議她終止中止合約,而該70萬元裝修費可透過民事索償。她一邊說,一邊眼濕濕,「70萬係大數目,我唔係真係搵好多錢,買樓裝修,屋企人幫咗我哋好多,而家蝕緊嘅錢係屋企人辛辛苦苦賺返嚟,我覺得好對佢哋唔住。」她續稱:「諗過有水到,沖到涼,搵啲師傅裝返馬桶,再買啲現成傢俬,平平地住住先。等我哋儲一筆錢後再裝修。但屋企人心痛,繼續幫我哋。」於是屋企人再提供約50萬元聘請另一家裝修公司執尾。

記者到爛尾單位,現場所見,灰灰黑黑,全屋電線吊吊揈,有的從天花板伸出,有的從牆身牆腳走出。牆身不時出現一個個窿,見到石屎外露。除了大門,廚房門、廁門、房門都未裝。主人房的地台凹凸不平,露出一條條藏喉的坑。更甚的是,兩個廁所都未裝馬桶,主人房屎渠口被木板遮住,但仍傳來臭味。陳太無奈道:「呢半年我好唔開心,好多晚都瞓唔著,壓力好大,搞到起濕疹。覺得自己好蠢,信錯朋友,知道佢欠好多工人錢,包括我單位,我希望唔好再有其他人受騙,唔好有其他工人做咗嘢而收唔到錢。」

記者接觸到一名遭W先生欠薪的裝修工人,他說正努力找他算賬。另外一名業主自言算是好彩,只是曾聘用W先生全屋裝修,沒有爛尾,但當時曾借錢給W先生,相信一去不返了。根據法庭文件,W先生的裝修公司於去年被追債約74萬元,以及多宗欠薪事件。根據其他苦主提供W先生住址,記者登門造訪,信箱無開多時,箱內有信顯示姓氏與W先生不相符。單位門窗深鎖,拍門多時無人應門,附近街坊則表示不認識有這位住戶。不排除這是W先生給苦主的假地址。最新進展,苦主陳太已報警。

就着陳太的情況,律師黃汝仲表示,這屬於典型的裝修爛尾個案,當事人一般可以循民事或刑事途徑作出追究。不過,假如相關裝修公司已經清盤,透過民事途徑取得賠償的機會不大;如果作出刑事訴訟,需要有一個足夠證據證明有無干犯刑事罪行,例如欺詐。他建議,消費者可以聘用坊間一些公正行監督裝修工程,以防裝修爛尾。

爛尾工程4個迹象

香港工程公正行檢測主任林建輝表示,一般監督裝修工程主要睇工程進度及施工質量,向業主提交報告,例如空心磚、施工期有機會延誤等等。通常按次收費,如果3個月工程,每個月睇一次,收費與驗樓相若,即1,500至4,000元不等。林建輝指出,其實裝修過程中有些爛尾端倪是可以睇到的,例如真空期,雖然去年疫情影響,但裝修工程的進展一般都是延誤半個月至一個月,所以如果單位出現8至10日沒有工人工作的情況,很有機會是爛尾收場。作為戶主有責任注意合約條款,其中一項是付款方式,一般分3至4期,每期支付需要到單位現場觀察是否已合理地按步驟完成,例如第一期做泥水,第二期做水電,無理由泥水都未做好就問拎水電的裝修費用。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner