今期樓行|黃竹坑區適合居住?無街市、茶樓民生配套 市民呻「叫外賣都等個幾鐘」

更新時間 (HKT): 2021.04.18 00:00

南港島綫通車近5年,高速轉型的黃竹坑區,沒有了昔日公屋黃竹坑邨,取而代之為黃竹坑站一帶私樓豪宅。正當市場焦點落在即將推售的首個黃竹坑站上蓋樓盤之際,原來區內民生配套完全追不上需要。記者走訪一趟黃竹坑,無論是民生街市、給人品茗食點心的酒樓和購物商場都欠奉,居民多依賴前往鄰近的香港仔補給日常所需,究竟是時代急速發展,以致政府的「計劃趕不上變化」,還是只求出售「麵粉」予地產商,將民生需求閒置一角?黃竹坑站上蓋將會有逾5,000多伙陸續落成,基本的衣食住行需求遠超出小型社區的承載力,區域發展帶來的負荷值得關注。

政府2010年拍板興建南港島綫東段,2016年底通車,黃竹坑正高速轉型,路線由金鐘延伸至海怡半島,途經海洋公園、黃竹坑、利東三站。黃竹坑站原址為黃竹坑邨,佔地7.17公頃,南面是住宅區,北面是由香葉道分隔,正在轉型中的為商貿區。

2017年進駐黃竹坑的時裝品牌及刺繡工作坊YLY Studio,是港鐵通車後首批商戶,負責人Lilian和Matt計劃同步發展設計與工藝,需要物色一個相對平租、整潔、安全的環境開班,最終以每月1.8萬元租用新型商廈W50的中層單位。「初期開workshop時,港鐵只係通車幾個月,好多客對呢區好陌生,我哋專登做咗個好簡單嘅地圖,上面寫住由金鐘地鐵站轉車過嚟只係5分鐘,然後由地鐵站行過嚟只係2、3分鐘,所以10分鐘就可以由金鐘嚟到我哋studio。」

港鐵通車將近5年,工業區已逐漸蛻變成商貿區,W50周邊的新型商廈越起越多,甲廈租金大躍進,但一般社區配套依然不足,簡單如買文具,Lilian都需要上網搜尋,「唔知附近邊度有文具賣,商舖都隱藏晒喺工廈入面。」

區內早晚繁忙時間人流越來越旺,但周末和晚上猶如另一世界,「好似與世隔絕咁,好唔香港!」兩人間中工作至深夜,最困擾的是搵食問題,Matt說:「黃竹坑好難搵食,大部份選擇都係工廈食堂,或者好隱蔽嘅工廈食店,始終選擇好少。即使想搵間便利店,全區只得一間,而且好神奇,有時開到夜晚9點已經閂門,隔籬啲食肆6點又閂晒,所以趕project做得夜係冇嘢食,要叫外賣。」旁邊的Lilian忍不住補充:「外賣又要等好耐,一個快餐要等個幾鐘,做得太夜好慘!」

對於黃竹坑工業及住宅區相繼轉型,Lilian期待可以為公司帶來新客源,「對我哋嚟講係好事,就算依家同人講黃竹坑,第一下都會覺得好遠,希望新發展令更多人認識黃竹坑,唔好只以為係海洋公園咁偏遠嘅地方。」不過Matt坦言地區發展是雙刃劍,擔心黃竹坑的社區特色會消失,「呢區除咗上樓公司,路面都有啲好有趣嘅嘢,例如好多好靚嘅graffiti,當地區發展得越好,呢啲嘢越容易消失。對我嚟講,黃竹坑係好多藝術同人集合一齊嘅地方,我希望可以繼續保留呢區一路以嚟建立嘅特色。香港唔係只得經濟,藝術對我哋嚟講都係好重要。」

商貿區的上班族人數激增,率先受惠的是鄰近港鐵站的南朗山道熟食市場。開業34年的生記食店只做早餐時段,生意多得應接不暇,老闆娘楊女士指近年黃竹坑區轉變迅速,人流跟以往截然不同,「寫字樓客好捨得食,佢哋可能鍾意我哋呢邊比較有風味,價錢比起飯堂平3至5蚊。」另一間位於熟食市場1樓的農民泰國菜在港鐵通車前開業,店主黃太稱初期生意淡靜,捱過一段時間才儲到熟客,「依家好多寫字樓同地盤工人過嚟食,生意好咗好多。」她指熟食市場內有20多檔食肆,選擇多元化,但購物非常不便,「買菜、買生果都冇,呢度冇地方買嘢,連7-11都冇間!」

至於在黃竹坑居住數十年的老街坊馮生,對於未來的社區轉變不以為然,更聲言當年曾簽名反對興建港鐵。「我出外面盡量搭巴士,唔覺得唔方便,人人需求不同,我唔係嗰啲一落街就要食雲吞麵嘅人。以前冇地鐵,喺15至30分鐘內一定可以出到灣仔、銅鑼灣,甚至尖沙嘴。」他指商場不過是遊樂園,自己一向是宅男,對購物需求不大。

南區區議員(黃竹坑)徐遠華表示,黃竹坑邨在2007年清拆後,區內原有的商舖、郵局、餐廳、酒樓、街市等一併消失,居民的日常生活設施主要依賴香港仔中心。「黃竹坑區嘅衣食住行配套嚴重不足,冇大型商場,冇銀行,櫃員機喺偏遠地方。呢幾年多咗寫字樓,食肆比以前多,但主要集中喺熟食中心,部份寫字樓大廈裏面會有餐廳,但對於依家增長得好快嘅人流量嚟講,食肆依然唔夠,呢邊亦冇酒樓,好多居民都反映過意見。」

交通一直是黃竹坑區的最大議題,雖然港鐵通車後,香港仔隧道的塞車問題大有改善,但南港島綫西段(連接香港大學站至黃竹坑站,途經瑪麗醫院、數碼港、華富、田灣、香港仔)遲遲未拍板興建,始終未能徹底解決南區交通的隱憂。「今年8、9月海洋公園水上樂園將會啟用,相信會好受歡迎,去水上樂園唯一路線必經深灣道,入深灣道對呢邊交通好大負荷,相信政府、區議會、商廈都好擔心,期望有更好配套。」

隨着未來港島南岸開設佔地起過50萬呎的大型商場,有居民憧憬可望改善區內購物場所不足的問題。「以前黃竹坑畀人感覺好陳舊、好罨耷,但經濟活動為呢區帶嚟生氣,好似變身咁有煥然一新感覺。但另一種轉變係居民多咗,需求亦增加,例如需要多啲食肆,不論居民或喺商廈返工嘅都好,大家都有共同關注同需求。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

掌握理財智慧 感受生活品味

investMAN全新網頁 優雅登場

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner