【智取大市】北水狂湧瑞聲炒復蘇 - 晉佳

更新時間 (HKT): 2021.04.19 02:00
■瑞聲舊年5至7月獲北水大手增持,今次盈喜後冇耐,北水短短3日由4.61%掃至5.21%,似重覆舊年強勢。 互聯網圖片

瑞聲(2018)之前發盈喜預計賺5.1至5.5億人民幣,以中位數5.3億計,今年市盈率18.6倍,作為優質手機設備股嚟講,算係略平,但故事未完。

首先,聲學產品方面,瑞聲今年推出「小腔體聲學」,將產品做得比客戶要求嘅更細小,由訂製變成高難度標準化,提升毛利率。

其次,MEMS咪高峯成為舊年第五批中國國家單項冠軍,代表技術係領先全國。MEMS係用喺自動駕駛聲控方面,據聞瑞聲已獲小量Tesla定單。

第三,根據公司預計,瑞聲光學業務喺𠵱家呢一季先收支平衡,按進度應該喺下半年開始賺錢。佢舊年主要提供低端塑膠鏡頭,WLG玻塑鏡頭舊年底開始先有具意義數目嘅投產兼定單,嚟緊帶嚟增長。

另外,光學業務誠瑞嘅股東包括小米同埋OPPO兩個大客,各持4%,呢兩大客點都積極落單。分拆誠瑞A股上市有進展嘅話,亦刺激股價。至於競逐康達智舊iPhone鏡頭廠,瑞聲係大熱,若成功投到,可憧憬瑞聲爭取下一步成為iPhone鏡頭供應商。

話說瑞聲舊年5至7月獲北水大手增持,其間亦係舊年唯一股價升浪。今次盈喜後冇耐,北水短短3日由4.61%掃至5.21%,似重複舊年強勢。第一站睇高盛目標價58蚊,長遠就睇下個港股升浪重返100蚊。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner