【笑到最後】拜登轉軚變Trump 2.0 - 高明

更新時間 (HKT): 2021.04.19 02:00
■拜登簽署行政命令,照抄持朗普功課。拜登今次成Trump 2.0意義重大,代表一個政壇老油條認同Trumpism有票。 資料圖片

拜登簽署行政命令,將今年難民入境人數維持1.5萬人,承繼上任總統邊境政策,同黨黨友AOC立即批評違反選舉承諾。年頭曾經寫文講過拜登係安逸派代表,即有左膠撲出嚟話拜登係進步派(Progressive)。𠵱家安逸到連上任總統政策都抄足,除咗本欄又中之外,都唔知講乜好。

黃金100日,變咗黑洞100日,頭幾個月唯一議題係佢幾時開記招,已經出事。所以高明完全理解拜登點解要咁做,大落後不如直接抄功課,而呢份功課過去四年已經證實有效,可以即時解燃眉之急。

上任前大家都覺得今屆係奧巴馬2.0,可能頭3個月的確係,白宮更加承認總統成日問奧巴馬意見。但時代轉得太快,奧巴馬政策已經不合時宜,從政47年嘅老油條冇可能唔知,此路不通立即轉軚。亦要讚拜登智囊,終於明白美國優先一路都係美國人核心價值。正如BLM領袖Patrisse Khan-Cullors,被傳媒報道喺白人區買豪宅,不論膚色,個個美國夢都係一樣,就係發達買大屋。

對於全球絕大多數冇美籍又唔會去美國嘅人,有咩意思呢?今次成Trump 2.0意義重大,代表一個政壇老油條認同Trumpism有票。Trumpism嘅量度指標係美股指數,每次破頂特朗普都會出tweet認威,預計拜登為保下年參眾議會議席,會行更多Trumpism政策。

比起特朗普自己行Trumpism,效法者一定要去得更盡,先可凸顯不同,即係話,如果特朗普推郁指數1,000點,同樣政策,拜登要升夠2,000點先可贏特朗普。至於係咩政策,高明已經難以想像,只係知方向將會係Trumpism加強版,美股將會係兩黨拉票嘅集中地。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner