笑到最後|股災股Joy同時發生(高明)

更新時間 (HKT): 2021.04.25 16:37
(蘋果新聞網)

萬眾期待3月股災冇發生到,如果唔睇納指嘅話,根本冇股災過。上個星期拜登增加資本增值說令到個市插落去,只係跌咗一日翌日又升返。銀紙長印長有,開始令人懷疑究竟以後有冇教科書上嘅股災。

但係,同契媽股性質接近:研發當中、稍有成果、未有盈利嘅股份,3月至今都出現小漲大回局面。揸住果一堆股,你已經股災緊。

以Cathie Wood旗下嘅旗艦基金Ark Innovation(ARKK)做指標,上星期五收報123.8美元,同2月高位仍然相差29%,相對納指同2月高位只相差2.47%,更加唔好提道指同標普已經破晒頂。

圖表派同財技派可能會簡單畀個答案你,話「炒完」。但股價跌咗落嚟,其實唔需要具備任何知識,都知道炒完。

如果講風險,比起有業務冇盈利嘅企業,更高風險一定係只有一堆code嘅虛擬貨幣。但係相對2月,淨係講比特幣同以太幣,即使經歷最近一個星期嘅幣災,最多只係跌返落2月水平,點解低風險啲嘅科技股,同更高風險嘅虛擬貨幣未炒完,但只係中間嘅破壞性未來股炒完?

升市源頭嚟自QE,升幅嘅分野都要用QE解釋。量化寬鬆印銀紙溝淡貨幣價值只係客觀結果。2008年量化寬鬆嘅初心,就係為咗拯救失敗企業。大得不能倒、保就業等,站在決策者角度,做得到就非常好,但真正目標始終係救自己嘅利益共同體,指數股就係建制一部份。

本來要清盤執笠,救一救永續生意兼夾同政權捆綁。以前股災嘅定意,唔單止股價大跌,連實體生意都準備執笠。依家股價下跌只係有人斬倉,生意逆市仲勁,所以貨幣貶值會受惠。

加密貨幣嘅存在,就係否定上述整個既得利益集團,外面世界risk on定off,同佢無關,兩者「票源」未必重疊,升跌只係反映制度外嘅人自行互片。

至於一眾未來股,佢係建制,但又未當權,只有喺大型股升無可升,有閒錢冇嘢炒,就將未來股一齊炒。

美股將會好似8號風球下嘅香港,食風地區地動山搖,偏遠地區風和日麗,有冇股災純粹睇你喺邊區。

高明

MeWe: https://bit.ly/2Y89PjV

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner