【Second Life】姜B餐代言費唔使一球? - 杜夫人

更新時間 (HKT): 2021.04.26 02:00
■麥記年頭邀請姜B做代言人推「姜B餐」,據聞連隊友成個代言費唔使七位數,呢單刁成為一時佳話。 資料圖片

初創企業燒錢是一定的。虛銀推出較高定存息率狂吸客之外,市場推廣方面花費亦不少,不過成效參差。

筆者早前簡單做咗個市場調查,訪問身邊50位20至40歲的朋友,近半都不太了解虛擬銀行同傳統銀行有咩分別,不過9成人聽過WeLab、眾安、livi同埋天星銀行。

講起天星,受訪者就自動聯想起「《全民造星3》的天星銀行」;講起WeLab就會識講「哦!BenSir嗰間!」。一個成功嘅Marketing Campaign除咗返到數,令人associate到你個brand,筆錢就叫使得值。

天星成功在於,上輯造星反應一般都夠膽冠名贊助新一輯,以及搵未知紅唔紅得起嘅參賽者做TVC及social media campaign。就好似某快餐店有先見之明,年頭已經邀請定姜B做代言人推「姜B餐」,據聞連隊友成個代言費唔使七位數,呢單刁成為一時佳話。

眾安和livi就實際啲,新一輪宣傳主力是「回贈」。大家都想知用虛銀有乜着數,體驗有幾快、幾好,所以呢類推廣都相當貼地,實際成效就要睇返到幾多數。

將推廣預算投放digital是大勢所趨,其一是可避免喺大台落廣告而出現被網民抵制的風險,最重要是跑數效率,digital可睇清每行動成本(Cost per action)。例如有幾多人click facebook ad後註冊做會員、開戶等。

紅色味最濃的富融同平安壹賬通早排都大力落廣告宣傳,可惜前者搞嘅抽獎劣評如潮;後者的TVC不鮮明,「貿易貸款一口價」對普羅大眾來講太難明了。再講,竟然想到在《東張西望》做宣傳,管理層有計過返到幾多leads嗎?

下集再詳細睇睇數碼營銷的成效。

杜夫人

fb.com/mrsmarydoo

關心你飯碗,貼近你生活,即Like「蘋果ATM」FB專頁!
BannerBanner