【智取大市】低調龍頭股後發先至 - 晉佳

更新時間 (HKT): 2021.04.26 02:00
■生科股近期強勢,榮昌係呢個板塊嘅優質股,舊年12月已經表演過升勢後發先至,今次亦好大機會追落後。 互聯網圖片

之前港股呈上落市,年初強勢股近期都喺低位轉趨橫行,又或者呈上升三角形,近日呢類股開始有陸續向上突破之勢。如果利用呢類圖表選股,你或許會發現成日watch list都係,選股嘅大原則有3個,第一,基本因素較實淨,揸得放心;第二,蟹貨較少;第三,睇CCASS證大戶資金冇流出。如果唔符合呢幾個原則,相信會留返最後追落後。

生科股近期強勢,高瓴愛股諾誠健華(9969)已經破頂,信達(1801)亦已突破,康方(9926)更加升近高位蟹貨區。中國抗體偶聯藥物(ADC)龍頭榮昌(9995)絕對係呢個板塊嘅優質股,舊年12月已經表演過升勢後發先至,今次亦好大機會再一次追信達、康方落後。

內地ADC藥主要係引入外國技術,榮昌叫得龍頭,就因為佢嘅抗胃癌藥RC48早喺舊年8月已經獲得中國NMPA接納新藥申請,只係等批,呢隻藥絕對比3月已批准上市嘅紅斑狼瘡症藥物RC18更為矚目。公司目前已經喺煙台啟動擴產,由1.2萬升增至3.6萬升。目前榮昌係深股通合資格股份,3月納入後北水已買2.64%。榮昌目前就係做緊一個上升三角形,若突破阻力線兼50天線108元,按量度升幅有條件見140元,隻股夠乾身,市況好轉嘅話,睇怕會向上破位。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner