操盤手札記|準備Sell in May?(割柑人)

更新時間 (HKT): 2021.04.26 17:56
有乜唔對路,準備Sell in May。

科技股流年不利,繼反壟斷、長債息後,又到「富人稅」衝擊!美國總統拜登競選時已提出加稅,據報周三佢會喺國會宣布加稅。當中,有錢人嘅資本利得稅由20%上調至39.6%,連同現有投資收益附加稅3.8%,投資者嘅聯邦資本利得稅最高將達43.4%,可能引發高估值科技股拋售潮!

抗疫救市,拜登拋出1.9萬億美元紓困法案、2.3萬億美元基建法案,要錢埋單就由加稅埋手。市場點睇?高盛指出,歷史表明,資本利得稅上調前,股價會下跌、股票配置會減少。事實上,上年3月中至今,以科技股為主嘅納指累升一倍,投資者喺加稅生效前沽貨獲利唔奇。

不過,拜登嗌價39.6%,似係「開天殺價、落地還錢」,最終加幅可能中間落墨,加到28%,或特朗普減稅前嘅25%。除咗有錢人,拜登亦向企業同企業海外分支加稅。美銀推算,股市整體EPS將下降7%,科技股最受打擊。據監管備案文件,科技業每年或多繳稅數十億美元。

美股急跌一日即收復失地,市場憧憬拜登新一輪萬億美元刺激經濟計劃,兼賭「富人稅」唔易過關。周一港股高開低走,跌0.4%。後市聚焦美國周三拜登國會演說、聯儲局議息,都喺香港時間周四見光,撞正港股期指結算,兼北水截流一周。有乜唔對路,準備Sell in May。

疫情反覆,印度最為嚴峻。印度係原料藥生產大國,同中國係兩大供應國,若印度因疫情停產或外國暫停入口,中國藥廠料將受惠。本港上市涉及厡料藥嘅藥股,包括石藥(1093)、聯邦制藥(3933)、新華藥業(719)。另外,BioNTech夥拍復星醫藥(2196)嘅疫苗,快於中國面市,亦可留意。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner