會師中環|政府應實施「樓市疫苗氣泡」(神仙丁)

更新時間 (HKT): 2021.04.29 17:02
首先,所有地產經紀必須先注射疫苗,唔打針無得見客,只能轉做後勤。
(CNS-HK)

今年以來官場一直有風聲指要整頓香港的房屋問題,奈何香港樓市就如平行時空:樓價指數按月連升3個月創20個月新高、黃竹坑新盤晉環三萬元一尺、古洞住宅地中標價較預期上限高逾40%,完全與政府政策背道而馳,在這個咩都講政治正確的時代實在是要不得,亦有損政府的管治威信。現時政府在推行疫苗注射方面已因交不到功課心急如焚、藥石亂投,所以不能任由樓市和發展商繼續為特首添煩添亂,所以本人在此提議一個一箭雙雕的方法作參考。

該方案叫「樓市疫苗氣泡」,主要以現時食肆的疫苗氣泡作藍圖。首先,所有地產經紀必須先注射疫苗,唔打針冇得見客,只能轉做後勤。然後顧客方面,唔打針唔可以睇樓,打一針可以星期一至五下午6時前睇樓,打足兩針就可以一星期七日睇樓至凌晨12點。再進取一點,甚至可以於按揭方面落手:唔打針做唔到按揭,打得越多針按揭成數就越高。如果政府實施此政策,只會有兩個結果可能出現:其一就是樓市因港人唔肯打針而成交萎縮、樓價下跌,然後終於解決房屋問題;其二就是港人為買樓而主動去打針,疫苗接種比率大幅上升。無論是哪個結果,都符合政府的政策方向,然後又可以向北大人領功。

做所有事都要以科學為本,新盤開售大量人群聚集、經紀睇樓接觸不同人士,本身就有傳播風險,我實在睇唔到點解樓市參與者有特權唔打針,而且毅然向本港地產市場實施防疫措施,更可顯示迎難而上的處事風格,所以林鄭如肯採納此意見,相信能夠挽回不少分數。

神仙丁

http://fb.com/AuditSlave/

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner