【智取大市】慢升破位點樣炒 - 晉佳

更新時間 (HKT): 2021.04.30 02:00
■以恒指計,港股似乎向上突破長方形阻力。資金輪流慢速推上高估值同低估值股份,仲會持續短時間。 資料圖片

以恒指計,港股似乎向上突破長方形阻力,有條件沿住保歷加上軸、以5天線為支持,呈現短線上升。指數上升而個股紛紛回吐,呈個別發展,其實都冇壞,起碼係慢升格局,但如果有一日,指數爆升同時二三線甚至落後股都喪彈,吸引散戶進場,反而先至最驚見頂。𠵱家頹頹哋咁升,反而可以升耐啲,但係選股就考功夫了。

資金口味時時變,前幾日炒起生科股呢類高估值股份,但噚日生科股回吐,就由銅股、航運股呢類低PE股份回氣上,資金輪流慢速推上高估值同低估值股份,仲會持續短時間。不過,去到5月份嘅某個時間,估計美股有機會展開大調整,暫時未知道係5月初定月尾殺到,會繼續幫讀者們跟進。

小弟IG、FB推介新天綠能(956),升半成後,收市公佈季績,首季多賺五成,收入升兩成,主要靠上網電量增長44%同上網電價升3.4%推動,頗為靚仔,年度化PE竟然係超低嘅2.8倍!即使當今年首季同上年首季佔全年盈利比例一樣,首季佔全年42%,咁計嘅市盈率仍然得4.6倍,仍然係平,估計嚟緊股價表現會唔錯,已跟進戰友可考慮繼續持有。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner