風水輪樓睇|馬鞍山人3招吸九運旺氣 曉峰灣畔背山面海好風水

更新時間 (HKT): 2021.04.30 00:00

讀者林生以770萬元買入馬鞍山曉峰灣畔一個背山面海的兩房單位,自我感覺良好,但是否真的好風水?在術數家蔣匡文眼中,馬鞍山是一隻馬,馬鞍山人難免走走趯趯,「有啲人可能要走動先會發達」。3年後,即是2024年,地運將由八運轉九運,蔣匡文就教馬鞍山居民3招催旺家宅的方法,想知?一齊《風水輪樓睇》。

林生去年花約770萬元買入馬鞍山曉峰灣畔5座中層單位,實用482方呎,「當初覺得呢度背山面海,同埋有條城門河比較舒服開揚一啲,所以就算西斜都唔係一個大問題。當然樓價及交通都是好重要的考慮因素,屋苑鄰近馬鐵大水坑站。」

蔣匡文指,林生新居的風水好壞參半,因為一間屋要睇外格局及內格局。外格局方面,單位的確是背山面海,但馬鞍山本身是一隻馬,「你話喇,馬會唔會企喺度?所以住呢度嘅人有一個特性,經常日出而入,日入而息,無乜留喺度,成日都要走。(咁搵食梗係要四圍走?)唔係㗎,可以係本地搵食㗎嘛,可以開間舖頭坐喺度都有生意嚟。但無所謂,現代社會有啲人可能要走動先會發達,我只不過講出性質,無講到吉凶,吉凶要因應每一間屋。」

蔣匡文續指,林生的單位座向是寅申向,客廳窗口外望食正城門河轉彎位,「我成日講,直沖唔好,但而家呢條河直沖,如果沖正旺星,古人叫『沖起樂宮無價寶』(是吉)。而呢個位遇到八運旺星,所以過去20年呢度嘅業主都好旺。但來緊九運,八運旺星有少少退氣,就無以前咁旺。但只要呢個位遇到流年旺星都會非常之好。」雖然窗外旺星退氣,但無獨有偶,單位門口卻迎來九運當旺的旺星,有將來的旺星幫助,所以這個單位唔差。加上,外圍對正樓下巴士站,有聚財作用。單位唯一問題是睡房有夾角窗毛病,即是兩邊有窗,中間有牆分隔,兩窗大概形成90度,容易干犯流年凶星的格局,建議將其中一扇窗封閉。另外就是床尾無空間,視為沒有明堂,沒有錢剩。

林生就問蔣博士,走廊牆壁呈尖角對正單位大門,以及廚房鑽石形的影響。博士回應,大門情況叫「尖射」,視乎所在方位而有不同影響,以現在的方位,就容易影響情緒。另外,廚房的形狀是沒有影響的,睇廚房風水最重要是灶,切忌洗手盆對正灶,同時灶的座向亦有不同影響,目前灶是偏向東的位置,會影響男主人的健康,只要擺一盆泥種植物就可以化解。

尚有3年,即是2024年就轉入九運。蔣博士指出,只要掌握到飛星都可以發旺一段時間。以馬鞍山為例,整個沙田背住獅子山,好處是有一條獅子山隧道,九運是旺南方有山有路,所以如果馬鞍山區內的住宅單位的北面有水,住戶就會比較旺,例如烏溪沙北面就有水,亦比較旺。一般而言,馬鞍山住戶在室內的北位放水都有幫助,室內南方放置4支富貴竹利文昌。至於桃花方面,當然視乎各人命格,但在東南位放置鮮花可催旺人緣,但切忌假花、帶刺或下垂的花朵。「當然每個單位需要詳細計算,但整體而言都可以咁做。」

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner