笑到最後|請菲傭的財富見解(高明)

更新時間 (HKT): 2021.05.02 11:11
高明指,三個幾月封城一次,菲傭在家庭崗位上,至少有如台積電代工一樣,有不可取替的地位。

最近突然要求外傭強制檢測,新簽約外傭要打疫苗,先至會批出簽證。

今次疫情,令大家明白多咗好多嘢,例如就算係一模一樣嘅事情,只要現狀被打破,市場嘅價格都將會唔同。

其中一個例子就係晶片,疫情前晶片股係咪勁?係,不過疫情之後,發覺晶片無法取代更加勁。疫情之後基本上所有晶片板塊都升升升。

菲傭地位有如歐洲同日本,以為唔起眼,過去兩年晶片事件,令更多人發現,歐洲掌握晶片設備關鍵技術,日本掌握半導體原材料,兩者皆有無可取代的性質,特別係國際貨運因為政治及物流原因,無法送達,自給自足必需要設備及原材料,關鍵資源重要性更強。明明疫情前後都係嗰樣嘢(可能製程先進咗一兩代),疫情後不論產品定係股價已經係兩回事。

越係上游嘅產業,喺冇得進行國際商貿嘅情況,屈機位越強。由一個國家縮細到一個家庭,以前有得分工合作嘅時候,例如食飯可以選擇出街食,小朋友正常有學返,對家庭嘅重要性冇咁高。但係三個幾月封城一次,菲傭就喺家庭崗位上,至少有如台積電代工一樣,有不可取替嘅地位。

疫情嘅時候,菲傭已經水漲船高,有報道話有外傭簽約人工已經過萬,雖然呢個價位可能只係個別,但係外傭挖角潮已出現,因為當中關鍵地位,已經顯然易見。第日即使通關,最低工資都唔係必然請到嘅價格。

有朋友問,屋企嘅家傭好難管理,應該點做?我答,如果你overpay,你就係老細;如果你underpay,佢就係老細。

離鄉別井、傭主難頂、居住環境惡劣、工作性質複雜,依家再加上通關唔易、被迫打疫苗、知道自己關鍵性地位,以上全部都係用錢來衡量:要求越多,人工越貴。

所以,只要有少少「財富見解」,就會知underpay僱員,最後自己受返。當然,小農DNA梗係覺得自己畀少咗好威威周圍唱,慳返嚟嘅錢,仲可以請印度打手,喺臉書用中文留言支持自己添!

高明

MeWe: https://bit.ly/2Y89PjV

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner