操盤手札記|沽貨撈貨 兩手準備(割柑人)

更新時間 (HKT): 2021.05.03 17:45
京東分拆京東物流,最快本月招股上市,有助釋放價值兼刺激估值。

「五窮月」開局,先睇外圍形勢,美國10年期債息由3月尾高位1.778厘,回吐0.25厘至4月中低位1.528厘,上周議息後又高見1.684厘。今年以嚟,長息同美滙呈正向關係,長息轉強意味美滙亦轉強,事實上,美滙指數上周重越91關。美滙轉強則意味股市可能回調,尤其納指。

再睇內地形勢,五一長假前夕,中央政治局開會,重申宏觀政策不急轉彎,雖然提到貨幣政策要保持流動性充裕,但估計央行會維持緊平衡。地方新增專項債券額度1.77萬億人民幣已喺3月下達,預計集中今季發行,5月流動性缺口隨時超過萬億,不利股市,尤其深證創指。

港股憂慮重重,內憂藍籌接連抽水,外憂各國央行收水,又憂新興市場疫情。周一,恒指跌1.3%,收28,357,支持位睇3月25日低位27,505,阻力位睇29,000關,此關上月3度上破但未能連守3日。「五窮六絕」當前,投資者可部署Sell in May,亦可部署Bottom fishing,兩手準備!

若想部署撈貨,宜睇中長期大趨勢、大主題,例如科技趨勢。不過,本港上市嘅科技股,主要係中資股,最大風險係政策風險。上周四,繼阿里巴巴(9988)、美團(3690)後,騰訊(700)傳出遭反壟斷調查;當晚,13間科網企業又被內地金融監管機構約談,作7項整改。

科企龍頭ATMXJ,由2月高位計至今回落17%至36%。當中,京東(9618)現價回到上年10月水平,相對阿里、騰訊只回到今年1月水平更值博。京東分拆京東物流,最快本月招股上市,有助釋放價值兼刺激估值。該股現價298.8元,PE 15.2倍,PB 4.1倍,估值吸引。不過,京東未有反壟斷消息,屬不明朗因素。

割柑人

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner