【智取大市】美股現大調整訊號 - 晉佳

更新時間 (HKT): 2021.05.03 02:00
■美股4月下旬有轉弱迹象,近期靠大股頂住指數,唔少二三線股彈唔起,重磅科技股首季業績已發佈,再難搵到短期上升催化劑。 資料圖片

上一期輕輕提到,美股5月有機會出現大調整。還記得今年2月份,本欄講過納指突破月線保歷加上軸兼拋離5個月線,下一個月隨時出現大調整,結果3月科技股的確跌到反艇。呢個類似訊號,上個月出現喺標普500指數之上,因此不能不提。

舊年3月到𠵱家,標普500已經第三次出現呢個訊號,次次下一個月都調整出現陰燭,爭在跌多跌少。根據過往趨勢,指數翌月多數衝高再倒跌,但亦有機會好似2018年2月咁,月初已經急插,於是難以預測今次跌市會喺5月邊段時間展開。樂觀嘅話,標普500可能再破多次頂,5月中開始先大跌,悲觀啲,月初已經有條件開始跌,穩陣啲,5月內要有定跌市心理準備。

論美股市況,4月下旬確實有轉弱迹象,近期靠大股頂住指數,唔少二三線股彈唔起,而重磅科技股首季業績亦已發佈,再難搵到短期上升催化劑,即使指數仍有可能月中先見頂,但整體美股似乎係用「捱」字嚟形容,談不上形勢有利。當美股有可能向下,弱勢港股形勢固然更差,上周四恒指低成交突破,滿以為仲有得慢升頂多陣,點知周五反高潮低成交倒插。

以過往幾年上落市趨勢,通常港股呈三角形先向上假突破、再向下突破,多數會弱一段時間,大家要留神。上述嘅標普500長線走勢圖,已放上小弟嘅IG同FB,大家有興趣可慢慢研究同討論。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner