【笑到最後】請菲傭之財富見解 - 高明

更新時間 (HKT): 2021.05.03 02:00
■請菲傭也要有財富見解,如果你overpay,你就係老細;如果你underpay,佢就係老細。 資料圖片

最近突然要求外傭強制檢測,新簽約外傭要打疫苗,先至會批出簽證。

今次疫情,令大家明白多咗好多嘢,例如就算係一模一樣嘅事情,只要現狀被打破,市場嘅價格都將會唔同。其中一個例子就係晶片,疫情前晶片股係咪勁?係,不過疫情之後,發覺晶片無法取代更加勁。疫情之後,所有晶片板塊都升升升。

菲傭地位有如歐洲同日本,以為唔起眼,過去兩年晶片事件,令更多人發現,歐洲掌握晶片設備關鍵技術,日本掌握半導體原材料,兩者皆有無可取代的性質,特別係國際貨運因為政治及物流原因,無法送達,自給自足必須設備及原材料,關鍵資源重要性更強。明明疫情前後都係嗰樣嘢(可能先進咗一兩代),疫情後不論產品定係股價已經係兩回事。

越係上游嘅產業,喺冇得進行國際商貿嘅情況,屈機位越強。𠵱家三個幾月封城一次,菲傭喺家庭崗位上,至少有如台積電代工一樣,有不可取替嘅地位。疫情嘅時候,菲傭已經水漲船高,有報道話有外傭簽約人工已經過萬,雖然呢個價位可能只係個別,但係外傭挖角潮已出現。第日即使通關,最低工資都唔係必然請到嘅價格。

朋友問,屋企家傭難管理,應該點做?我答,如果你overpay,你就係老細;如果你underpay,佢就係老細。離鄉別井、傭主難頂、居住環境惡劣、工作性質複雜,𠵱家再加上通關唔易、被迫打疫苗、知道自己關鍵性地位,以上全部都係用錢來衡量:要求越多,人工越貴。

所以,只要有少少「財富見解」,就會知underpay僱員,最後自己受返。當然,小農DNA梗係覺得自己畀少咗好威威周圍唱,慳返嚟嘅錢,仲可以請印度打手,喺臉書用中文留言支持自己㖭!

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner