【冰說聰明】恒指新貴三穩膽 - 青冰

更新時間 (HKT): 2021.05.06 02:00
■恒指變革後首次的季檢,結果將會在5月21日收市後公佈。 資料圖片

踏入五月,亦是恒指變革後首次的季檢,結果將會在5月21日收市後公佈,恒指公司話希望在2022年中前,把成份股數目增至80隻,而現時的成份股共有55隻,換言之在未來五次的季檢中,平均每次增加5隻。

按恒指最新的編算文件,候選資格是恒生綜合大中型指數成份股,現時兩個指數的成份股共有313隻,即係話非藍籌的候選股就有258隻。市值逾二千億的候選股共有11隻,百度(9888)因在3月上市,未達上市歷史要求,快手(1024)在2月5日上市,以往的規矩,截數日是在3月底,快手係唔夠秤的,不過青冰細看最新的編算文件,原來上市歷史要求,是計算至季檢公佈當日,咁快手就剛夠3個月入到閘。

快手的粉絲不用開心得太早,因為佢同百濟神州(6160)都有同樣的問題,就是仍然錄得虧損,雖然恒指公司從來無講過,無盈利不能染藍,但回顧咁多年,做咗藍籌可以蝕錢,但蝕住入選就欠奉,即使係2月染藍的阿里健康(241),上年度雖然蝕錢,但按財經界常用的最近十二個月數字(TTM),已經錄得盈利,至於恒指改革後會否寬鬆執行這個盈利準則,就決定快手及百濟神州的命運了。

撇開快手、百度及百濟神州,招行(3968)機會都係窄啲,始終藍籌內太多金融股,青冰估即使要加佢,都要等多兩、三round先。咁餘下的就是京東健康(6618)、網易(9999)、思摩爾(6969)、碧桂園服務(6098)、京東(9618)、農夫山泉(9633)及華潤啤酒(291)。睇返諮詢結果的文件,需要增加股數最多的行業,分別是消費股及醫療保健股,所以京東健康、思摩爾及農夫山泉應是穩膽,現時仍有兩個星期先公佈,戰友們仲有大把時間趁低收集嘅。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner