【智取大市】加息嚇窒新舊經濟 - 晉佳

更新時間 (HKT): 2021.05.07 02:00
■港股近期波幅快而短,並非好兆頭,如果未能快速回復悶市格局,恒指向下突破機會偏高。資料圖片

銅、鋁、鋼價格以至波羅的海乾散貨指數齊齊破頂,而中國出口集裝箱運價指數亦升近年初頂部,帶動相關股份齊齊破頂嘅背後,可以想像未來通脹壓力頗大,耶倫就加息出彈弓口,市場亦成驚弓之鳥。

加息預期對於新經濟股壓力尤其大,試想像呢批用市銷率計數、市盈率都未必有嘅股,喺零息環境下當然可以大買特買,只要零息預期稍有動搖,長期回報難以抵禦資金成本,沉重沽壓繼續存在。

5月12日美國公佈CPI數據,估計數據前後,科技股會繼續弱,呢個時候,大價股如騰訊(700)、美團(3690)喺上落市形成嘅長方形支持線已見危危乎。諗住舊經濟股可以係避險天堂?最矛盾嘅係鋼股、煤股、航運股等等,甚至中電(002)、煤氣(003)同電能(006)亦全線升到拋離保歷加通道上軸,有整固必要。新經濟未跌完,舊經濟又超買,喺5月份某個時段,股市有機會出現較全面嘅跌市風險。

以小時圖觀察恒指走勢,亦反映出上述形勢。踏入4月尾至5月初,恒指打破悶局單邊向下跌約1,000點,但近日回穩後,波幅再度變得快而短,非好兆頭,如果未能快速回復悶市格局,恒指向下突破機會偏高。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner