笑到最後|10年大勢又再重複(高明)

更新時間 (HKT): 2021.05.09 16:35
美國財長耶倫,早年曾出任聯儲局主席。 資料圖片

美國職位增長遠遠差過預期,科技股又再升過。唔夠一個星期之前,做過聯儲局主席嘅美國財長耶倫仲走來講話要加息,因為經濟增長好強,短短幾日就俾數字推翻佢嘅講法。

相對網上討論區投資者鍾意將自己短線投機變長揸嘅行為,美化為Strong Hold(SH),高明嘅行動雖然大同小異,但背後原理唔同,唔盲目相信隻股會自動to the moon,係唔相信貨幣政策會有真正嘅收縮。

作為一個喺股海碌咗十幾年嘅人,過去十年最大騙局,首推「第四季加息」,大概由2010年開反覆有聲音講加息縮表,而呢個騙案,本人都係受騙者之一。當年危機比起今日更嚴重,美國未復元,歐洲又嚟,但係美帝官員會將由低位反彈所致嘅高增長數字,包裝成經濟增長強勁好快加息,配合主流傳媒解讀及大行預測「第四季加息」,當年本人都信咗,直至今年年初,先知嗰班大合唱嘅人,叫deep states。

計一計數,聯儲局最新資產負債表為7.81億美元,對比08年海嘯QE前9,017億美元,撇除你嘅勞動成果,你嘅身家冇升8.7倍,你都係受騙者之一,身家喺佢印鈔你攤薄嘅情況下縮咗水都唔覺。

至於未來點解冇乜條件收縮貨幣政策,就係因為科技股升,背後理論係疫情加速一系列科技化流程,好多工作唔需要再請咁多人。加息除咗打沉科技股價之外,達唔到咩實際目標。

今年傳統股神畢菲特的巴郡上升26%,Cathie Wood旗下嘅Ark Invest下跌12%,事隔只係半年新舊股神tittle互換。畢菲特問,未來30年最大市值企業會唔會再升20倍?即達60萬億美元,即係現水平再升20倍。資本主義運作得越來越好係部份原因,但最重要原因,係一路貶、一路印,最終達同冥通平水。

當年嘅民主黨奧巴馬集團嘅身影,今日又一一重現執政體系。睇嚟當年又要印又要扮有紀律嘅情況,未來10年會發生多次。

高明

MeWe: https://bit.ly/2Y89PjV

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner