【智取大市】中美想要冧市? - 晉佳

更新時間 (HKT): 2021.05.10 02:00
■中國一連串打擊科技龍頭、互聯網金融、樓市泡沫等等嘅措施,明顯寧願有個短而急嘅跌市,都唔想經歷可能長達兩三年嘅低潮期。 資料圖片

滯脹係咪一定會出現?唔知,只不過,美國經濟數據差,同時資源以至運費爆升,晶片供應短缺預示產出將持續低迷,經濟弱、通脹高,係咪好容易想像到滯脹?你唔諗,啲基金都會諗。

滯脹唔使一定要出現,但只要滯脹感染到市場,就夠大問題。第一,通脹高,資金成本會跟住偏高,10年期美債孳息率仍然喺1.6厘左右上落,持續喺呢個水平,長線資金已經要喺高估值股份不斷流出,而滯脹不利股債,通脹同時債價跌孳息升,令高估值股份陷入惡性循環。

第二,滯脹係一個漫長過程,如果迫在眉睫,中美會容許滯脹出現?定係長痛不如短痛?若然係後者,容許一個市場危機出現,令股市急跌至吸引水平,同時經濟快速短期衰退,由較低基數出發,reset再重拾增長,以大局出發,不失為一個出路。

中國方面似乎幾明顯,先由波叔宣佈上調印花稅、郭樹清警告美股泡沫,以至一連串打擊科技龍頭、互聯網金融、樓市泡沫等等嘅措施,中國明顯寧願有個短而急嘅跌市,都唔想經歷可能長達兩三年嘅低潮期。美國方面?從政治陰謀論去諗,拜登剛上場冇耐,短期股市大跌都可以賴落上一手,容許股市大跌過後再喺任期第三、四年reset經濟增長谷選票,似乎合理不過!巴西兩個月內加息1.5厘,反映唔少經濟體系已經嗌救命。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner