【操盤手札記】幣策轉向慎揀股 - 割柑人

更新時間 (HKT): 2021.05.11 02:00
■喺貨幣政策趨正常化下,受惠經濟復蘇嘅舊經濟股可望重生,中銀香港可候回吐收集作長線持有。 資料圖片

收水!上周,英倫銀行宣佈放慢買債步伐;三周前,加拿大央行宣佈減少買債,並暗示提前喺明年下半年加息。當英、加等主要經濟體相繼邁向貨幣政策正常化,美國聯儲局呢?本周焦點係:中國周二公佈4月CPI同PPI、美國周三公佈4月CPI,通脹勢必升溫,收水只差遲早!

所謂收水,第一步係縮減買債,之後係加息,再之後係縮表(收縮資產負債表,即賣出之前買入嘅債券)。英、加正踏出第一步,日本則喺3月宣佈取消買ETF;土耳其、巴西、俄羅斯更已進入加息周期,小國如阿美尼亞、塔吉克、津巴布韋、烏克蘭、克魯吉亞亦相繼加息。

其實,今趟最先出現貨幣政策轉向訊號嘅係中國。1月,人民銀行官員示警,中國已見泡沫,貨幣政策要進行適度轉向。人行其後多次重申貨幣政策「不急轉彎」,但要注意,「不急」唔係「不」!春節前後,已見人行持續減少逆回購收回流動性,令市場資金維持緊平衡。

收水皆因放水起!疫情之下,各國以量寬托經濟,又不斷舉債大撒幣,將財政赤字貨幣化。貨幣超發,必引致通脹,尤其美國貨幣超發。美元係全球貨幣根基,美元貶值,會令商品、黃金、股市、樓市等資產漲價。疫情影響,無論係去全球化定貿易保護,最終都指向通脹。

周一港股跌0.05%,收28595。喺貨幣政策趨正常化下,高估值新經濟股被殺,受惠經濟復蘇嘅舊經濟股則重生。當中,中港銀行股多屬低估值、高股息,兼且「跨境理財通」料6月開通,可留意。

港銀中,中銀香港(2388)最積極參與跨境金融服務。該股連升5日,現價29.5元,可候回吐收集作長線持有。

割柑人

關心你飯碗,貼近你生活,即Like「蘋果ATM」FB專頁!
BannerBanner