【平行時空】波叔思路難捉摸 - 商飛人

更新時間 (HKT): 2021.05.12 02:00
■消費券細節尚未確定,日前財政司司長陳茂波改口話,𠵱家政府唔再分五期派發。 資料圖片

由財政預算案公佈至今兩個半月,消費券細節尚未確定。日前財政司司長陳茂波改口指,𠵱家政府唔再分五期派發喇,但又唔可以一次過派發。咁究竟會(1)分兩月、(2)分三個月、(3)分四個月,定(4)以上皆不是呢?波叔仲未答到。有曾與政府交流意見嘅零售及餐飲業界人士就覺得,司長今鋪「諗多咗」,改來改去意義不大。

政府點解改口,唔再分5期派?消息人士透露,這是部份議員的主意,期數分少啲,每期派發金額大咗,銷售貴價貨品或服務嘅公司都可以得益。呢個說法亦得到波叔認證,話期數壓縮可以讓市民購買較高價嘅電器之類。

消息人士突然突破盲腸:「想人買貴嘢,一次過派5,000蚊咪得囉?我都係咁畀建議政府。你一次過派,啲人鍾意點用就點用啦,貴又得平又得。反而你照舊分五期,每期1,000蚊,假設啲人想買2,000蚊嘢,可能啲人仲會自己使多1,000蚊添,咁先有個效果呀嘛。𠵱家每期派嘅錢多咗,其實啲人唔使用自己錢可能已經買到貴嘢,你引唔到啲人使凸嗰5,000蚊,咁有咩用?」聽到我𢱑晒頭。

(政府話唔會一次過派喎……)消息人士長嘆一聲:「唉!佢冇講點解,我都唔係好了解司長嘅思路,可能佢諗多咗。」

政府左度右度之際,剛公佈的本港3月零售數據表現之中,百貨公司及藥妝行業可謂自由行退潮後裸泳的零售類別,前者一年前銷貨值跌43.3%,後者跌64%;一年後基數低到一個點,都只係分別反彈2.2%及升18%,明顯遜於其他零售類別。被問到消費券使用期限能否延長至明年農曆新年,波叔續賣關子話「有得諗」,市民收到錢後用喺邊冇人知,但政府再係咁諗來諗去,恐怕商家們諗都唔使諗點吸金已支持唔住。

商飛人

關心你飯碗,貼近你生活,即Like「蘋果ATM」FB專頁!
BannerBanner