【信里一城】觀塘最凶工廈之一 - 小師兄

更新時間 (HKT): 2021.05.13 02:00
■一個真正的工廈投資者其實唔係怕鬼,最怕是所買單住冧價、蝕讓、銀行唔借錢。 資料圖片

朋友睇中觀塘凱源工業大廈,見到呎價比同樣在開源道的開聯工業中心平約兩成,幾乎諗都唔諗就想買入一個單位。我跟他說,這幢工廈是我見過開源道最凶的工廈,大廈低層有單位燒炭,中層有單位吊頸,天台有空中飛人。另外,附近成運工業大廈、觀塘工業中心都是有多於1宗兇案的工廈。

老實講,香港地有邊度係無死過人。作為一個真正的投資者點會怕鬼,怕的是冧價、蝕讓、銀行唔借錢。不少銀行對於極凶的肇事單位,不論住宅或工廈都借唔足。你會話,買工廈已經畀到5至6成首期,借得4至5成都借唔足?係呀。當然死得無咁凶,或同層或樓上樓下的自殺單位都可能唔使點打折或借足。但死得怨、死得慘、死正在單位等極凶廈,莫說按揭打折,甚至乎是一個崩都唔借。荃灣Dan6「石棺藏屍」單位,土地註冊處資料顯示,單位在2019年以178萬元易手,資料沒有顯示新買家有承造按揭。在下曾經接觸一個自殺單位,買家信貸記錄良好,可以支付5成首期,但按揭卻要打6折,幾乎要一筆過支付,他最終轉買另一件貨。

坊間未見有一些像凶宅一樣有系統的凶廈網,往往是網上搜尋或靠經紀,有時候借按揭時才獲悉借唔足或借唔到。朋友就問,他睇中單位位於凱源工業大廈X樓。我笑而不語。

小師兄

fb.com/siuching28

關心你飯碗,貼近你生活,即Like「蘋果ATM」FB專頁!
BannerBanner