【魚樂無窮】又有穩贏的機會 - 唐牛

更新時間 (HKT): 2021.05.13 02:00
■新一批iBond6月初起接受申請。iBond乃政府曲線派錢,穩贏的產品,實在諗唔到唔抽嘅理由。 互聯網圖片

落地獄多時的科網股終於反彈,但大多數仍然在地獄之中。反彈幅度係可觀嘅,不過見到人哋博中又唔使太失落,妒忌mode on等等;無他,只要望吓幅圖,幾支陰燭先出番支陽燭,即係博咁多日先中一日,贏埋都未必夠幾鋪輸。「有人一出手就中喎。」肯定呢個唔係多數,好波不如好運。

呢幾日戰意極低,一來市場氣氛唔就,寧願少做少錯,二來目標股份來來去去都係那幾隻,例如近日推介過嘅歐舒丹(973)、彌明生活百貨(8473),以及本欄長期愛股如嘉利國際(1050)、必瘦站(1830),貨底一直坐穩,炒上落嘅一注要等靚位入場,冇咁上下值博率嘅都無謂亂出手。一句到尾,寧願贏少啲都好過輸。

錢太多機會太少,收到唔少退休人士問,有乜收息股穩陣可以養老,只能夠講,穩陣同高回報兩者冇可能並存,高風險高回報,反之亦然。執筆之時,剛睇到新一批iBond發售詳情,發行額150億元,最高可增加至200億元,保證最低利息2厘,6月初起接受申請。不厭其煩講多次,iBond乃政府曲線派錢,有閒錢可坐到尾賺到盡,速戰速決嘅即沽都一定賺到餐飯錢,穩贏的產品,實在諗唔到唔抽嘅理由。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner